Segir að krakkarnir bjargi geðheilsunni

Ari Freyr Skúlason, landsliðsmaður í knattspyrnu og leikmaður Oostende í belgísku úrvalsdeildinni, segir að lífið sé erfitt án fótboltans en belgíski boltinn var blásinn af á dögunum.

Belgarnir ákváðu einna fyrstir að blása tímabilið af en skömmu síðar gaf FIFA út meldingu um það að Belgar gætu misst Evrópusætin sín með þessari ákvörðun. Því er allt í upplausn í Belgíu eins og er.

Ari Freyr var í spjalli í Sportinu í dag þar sem hann ræddi hvernig hann eyðir dögunum þegar enginn fótbolti er á dagskrá.

„Sem betur fer er ég með aktífa krakka, annars væri ég orðinn geðveikur. Við erum heppinn og erum með garð svo við förum í fótbolta og ég fer að hlaupa og þeir hjóla með,“ sagði Ari Freyr og hélt áfram:

„Svo inn á milli tökum við fótboltaæfingar í garðinum. Reyna að þjálfa þessa stráka eitthvað upp. Svo erum við með litla stelpu sem hleypur hérna um og stjórnar öllum og vill gera hitt og þetta. Aldrei sammála því sem við ætlum að gera. Það er líf og fjör. Án þeirra veit ég ekki hvað ég myndi gera.“