Öryggi íbúa ógnað með bresti innviða

Sveitarstjórn Eyjafjarðarsveitar harmar að innviðir hafi brugðist í óveðri síðustu viku og segir að á stórum hluta landsins hafi öryggi íbúa verið raunverulega ógnað. Öryggi íbúa þurfi að vera forgangsmál þjóðarinnar.

Þetta kemur fram í ályktun sem samþykkt var samhljóða á fundi sveitarstjórnarinnar í gær.

Þar kemur fram að nútímasamfélag sé háð raforku í nánast öllu daglegu starfi. Því sé óásættanlegt að kerfið sé ekki öruggara en svo að veður geti haft þau áhrif sem það hafði.

„Á stórum svæðum höfðu íbúar ekki aðgang að rafmagni, heitu vatni, útvarpi, alneti né síma og þannig hvorki með upplýsingar um stöðu mála eða leiðir til að kalla eftir aðstoð í neyð.“

Þar segir einnig að öryggi íbúa hafi verið ógnað og víða hefði geta farið illa, ef ekki hefði verið fyrir elju og óeigingirni björgunarsveitaraðila og annarra sjálfboðaliða.

„Öryggi íbúa, hvar svo sem þeir búa, þarf að vera forgangsmál þjóðarinnar,“ segir í ályktuninni.