Kim Kielsen gekkst undir hjartaaðgerð

Kim Kielsen, forsætisráðherra Grænlands, gekkst undir hjartaaðgerð á Ríkisspítalanum í Kaupmannahöfn á föstudag. Grænlenski fréttamiðilinn Sermitsiaq vitnar í upplýsingar frá forsætisráðuneytinu um að aðgerðin hafi heppnast vel og gengið samkvæmt áætlun. 

„Kielsen mun nota næstu daga til að jafna sig. Að öðru leyti hefur hann engin áform um að hægja á sér og hann verður aftur kominn í vinnufötin um leið og líkaminn leyfir,“ hefur Sermitsiaq eftir ráðuneytisstjóranum Hans-Peder Barlach Christensen. 

Fjölskylda Kielsen og nánustu samstarfsmenn hafa fylgst með aðgerðinni og eru með honum, að sögn Sermitsiaq.

Skýrt var frá því í lok ágústmánaðar að Kim Kielsen þyrfti að gangast undir hjartaaðgerð og læknar hefðu ráðlagt honum að hafa hægt um sig. Þá kom fram að Kielsen hafi við setningu danska þjóðþingsins fyrir tveimur árum veikst skyndilega og verið fluttur á Ríkisspítalann í sjúkrabíl. Síðar hafi komið í ljós að hann glímdi við hjartasjúkdóm. 

Kielsen fékk fyrirmæli frá læknum fyrir setningu grænlenska þjóðþingsins í haust um að taka því rólega til að hjartalyf, sem hann þurfti að taka fyrir aðgerðina, hefðu tilætluð áhrif. Þetta var skömmu eftir að Kielsen fékk yfir sig fjölmiðlastorm þegar Donald Trump Bandaríkjaforseti lýsti yfir áhuga sínum á að kaupa Grænland. 

Sjá hér: Grænland er ekki til sölu.

Kim Kielsen sendi sjálfur þessi skilaboð af sjúkrabeðinu inn á fésbókina sína í gær, laugardag: 

„Ég hef glímt við hjartasjúkdóm undanfarin tvö ár og hef af þeim sökum þrívegis verið lagður inn á sjúkrahús á þessu ári. 

Í gær gekkst ég undir aðgerð á Ríkisspítalanum. Allt gekk vel en mér er sagt að taka því rólega. 

Vona að þið eigið góðan dag, bros héðan.“ 

Heima á Grænlandi hóf Kim gríðarlega flugvallagerð með fyrstu sprengingu fyrir hálfum mánuði en flugvallamálinu hafa fylgt mikil stjórnmálaátök og kallað yfir Kim bæði stjórnarslit og vantrauststillögu eigin flokksmanna, sem hann hefur þó allt staðið af sér.

Sjá nánar hér: Áforma gerð ellefu flugvalla til að treysta framtíð Grænlands 

Til stóð að Kim Kielsen fundaði með Donald Trump Bandaríkjaforseta í Kaupmannahöfn í byrjun september. Trump aflýsti hins vegar Danmerkurheimsókninni eftir að forsætisráðherra Dana lýsti hugmyndinni um að kaupa Grænland sem fáránlegri.

Daginn áður en Trump hætti við Danmerkurför var Kim í Reykjavík og í viðtali á Stöð 2, sem sjá má hér: