Ingvar: Fór næstum því til Tyrklands

Ingvar Jónsson mun skipta um félag eftir áramót. Þá yfirgefur hann danska félagið Viborg en óljóst er hvað tekur við hjá honum.

„Ég er að skoða mín mál þar sem samningur minn er að renna út í Danmörku. Ég er frekar rólegur núna og er bara að skoða mína möguleika,“ sagði Ingvar yfirvegaður fyrir æfingu landsliðsins í Laugardalnum í dag.

„Ég hef verið í samskiptum við íslensk lið en það kitlar líka að vera úti ef það kemur eitthvað spennandi upp. Ég var nálægt því að fara til Tyrklands í síðasta glugga en það klikkaði. Það hefði verið spennandi.“

Markvörðurinn vill ekki meina að fyrsti kostur sé endilega að vera áfram úti.

„Það er allt óákveðið og spenntur fyrir báðum möguleikum.“