Southgate um Kane: Hann er stórkostleg fyrirmynd

Gareth Southgate, landsliðsþjálfari Englands, hrósaði Harry Kane í hástert eftir öruggan sigur Englands á Búlgaríu í undankeppni EM 2020 í gærkvöld.

Kane skoraði þrennu í 4-0 sigri Englendinga og sagði þjálfari hans að framherjinn væri stórkostleg fyrirmynd fyrir yngri leikmenn Englands.

Kane skoraði fyrsta mark leiksins eftir sendingu frá Raheem Sterling í fyrri hálfleik og bætti svo við mörkum úr tveimur vítaspyrnum í seinni hálfleik.

„Við stóðum og horfðum á hann taka vítaspyrnur í um tuttugu mínútur á æfingu í gær. Þegar þú horfir á ferlið sem hann fer í gegnum þá sérðu að hann gefur sér eins mikinn möguleika á að ná árangri og hann getur með öllum þessum æfingum,“ sagði Southgate eftir leikinn.

„Fyrir ungan leikmann að geta horft á hvað hann gerir, geta fylgst náið með honum og séð hvernig hann nálgast leikinn, það er stórkostlegt.“

Kane er nú kominn með 25 A-landsliðsmörk fyrir England í 40 leikjum.

„Hann vinnur svo vel fyrir liðið, er meira en til í að falla til baka og búa til pláss fyrir aðra, senda á liðsfélaga sína. En þegar hann fær sín tækifæri þá er hann með frábært hugarfar og tæknilega séð er hann frábær framherji.“

England hefur unnið alla þrjá leiki sína í undankeppninni til þessa og situr á toppi riðils síns.