Sakaðir um að framleiða átta og hálft kíló af amfetamíni í sumarbústað í Borgarfirði

Þrír hafa verið ákærðir fyrir að framleiða átta og hálft kíló af amfetamíni í sumarbústaði í Borgarfirði. Greint var frá þessu í kvöldfréttum Ríkisútvarpsins en þar kom fram að mennirnir eru einnig ákærðir fyrir að rækta 200 kannabisplöntur í útihúsi við bæ á Suðurlandi.

Greint var frá því fyrr í sumar að fjórir væru í gæsluvarðhaldi í tengslum við rannsókn lögreglu á skipulagðri glæpastarfsemi. Tveir af þeim höfðu hlotið dóma í Pólstjörnumálinu svokallaða fyrir áratug, en það eru þeir Einar Jökull Einarsson og Alvar Óskarsson sem eru tveir af þeim sem hafa verið ákærðir af embætti héraðssaksóknara.

Alls voru sex manns ákærðir í Pólstjörnumálinu á sínum tíma. Lögregla gerði fíkniefni upptæk í skútunni Pólstjörnunni sem lagði að bryggju í Fáskrúðsfjarðarhöfn að morgni fimmtudagsins 20. september 2007. Þar var reynt að smygla 23,6 kíló af amfetamíni, 13,9 kíló af e-töfludufti og 1.746 e-töflur til landsins frá Danmörku og með viðkomu á Hjaltlandseyjum og Færeyjum.

Einar hlaut níu og hálfs árs dóm í Pólstjörnumálinu en Alvar sjö ára dóm.