Ellen og Elton John koma her­toga­hjónunum af Sus­sex til varnar

Meghan Markle og Harry Bretaprins hafa verið harðlega gagnrýnd fyrir ákvörðun sína að fljúga bæði til spænsku eyjunnar Ibiza og Nice í Frakklandi með einkaþotu fyrr í mánuðinum. Fregnir af ferðalögum þeirra bárust aðeins nokkrum vikum eftir að Harry lýsti því yfir í samtali sínu við Dr. Jane Goodall að þau hjónin hygðust ekki eiga fleiri en tvö börn vegna ástandsins í loftslagsmálum. Nú hafa tvær stærstu stjörnur heims tjáð sig um gagnrýnina og varið ákvörðun hjónanna. 

Sjá einnig: Ætla aðeins að eiga tvö börn vegna loftslagvandans



Mörgum þótti ákvörðun þeirra að ferðast með einkaþotu skjóta skökku við í ljósi þess hve mengandi þær eru en hjónin hafa talað opinskátt um loftslagsmál og hvatt fólk til þess að taka betri og umhverfisvænni ákvarðanir í daglegu lífi. Í færslu á Instagram í lok júnímánaðar var haft eftir hertogaynjunni að hún hefði verulegar áhyggjur af ástandinu í loftslagsmálum og að of lengi hefði heimsbyggðin litið svo á að framþróun yrði að vera á kostnað plánetunnar.

„Þegar tæplega 7,7 milljarðar manna búa á þessari jörð skiptir hver einasta ákvörðun, hvert einasta fótspor og hver einasta aðgerð máli.“

Í færslu sem spjallþáttadrottningin Ellen DeGeneres birti á Twitter-síðu sinni rifjar hún upp fund sinn með hjónunum í Englandi. Hún segir hjónin vera jarðbundin og umhyggjusöm og væru aðeins að reyna sitt besta til þess að láta gott af sér leiða.

„Ímyndið ykkur að verða stanslaust fyrir árásum þegar þið eruð aðeins að reyna að gera heiminn að betri stað,“ sagði Ellen í færslunni.

Söngvarinn Elton John nýtti einnig Twitter-síðu sína til þess að tjá sig um fjölmiðlaumfjöllun vegna ferðalaganna. Söngvarinn, sem var góður vinur Díönu prinsessu, sagðist hafa boðið ungu fjölskyldunni til sín í frí eftir annasamt ár og jafnframt borgað fyrir flug hjónanna. Þá kolefnisjafnaði hann flugið fyrir hjónin því hann vissi að þeim væri annt um umhverfið.

Hann sagðist finna sig knúinn til þess að vernda bæði Harry og Meghan fyrir óvæginni fjölmiðlaumfjöllun í ljósi vináttu sinnar við móður prinsins. Það hafi einmitt verið slík umfjöllun sem átti þátt í ótímabærum dauða prinsessunnar árið 1997. Söngvarinn hefur alla tíð verið í nánu sambandi við fjölskylduna, en hann kom meðal annars fram í brúðkaupi þeirra hjóna á síðasta ári.