Auður fær það óþvegið frá formanni SAF

Bjarnheiður Hallsdóttir, formaður Samtaka ferðaþjónustunnar, fordæmir tónlistarmanninn Auðunn Lúthersson, sem gegnir listamannsnafninu Auður, með afgerandi hætti og sakar hann um að upphefja fíkniefnaneyslu.

Þetta gerir Bjarnheiður í pistli sem hún birti á Facebooksíðu sinni og hefur hann vakið mikla athygli. Eru margir til að taka undir með Bjarnheiði sem greinir frá því að hún hafi verið að hlusta á tónlistarveislu Rásar 2 frá Arnarhóli. Þar hafi komið fram ungur maður sem kalli sig Auð og hefur honum, að sögn Bjarnheiðar, verið mikið hampað og hlaut hann meðal annars átta tilnefningar til íslensku tónlistarverðlaunanna fyrir plötu sína „Afsakanir“.

Eðlilegt ástand að vera í vímu

„Lagið sem ég sá hann syngja heitir „Freðinn“ og er víst hans stærsti „hittari“. Ég tek það fram að ég þekki ekkert til tónlistarmannsins eða hans sögu en það var eitthvað sem argaði innan í mér við að hlusta á textann sem hann söng. Þar er hann sem sagt „freðinn“ eða í dópvímu og túlkunin er þannig að það sé bara mjög eðlilegt ástand að vera í vímu,“ segir Bjarnheiður.

Auður kom einnig fram í Garðpartý Bylgjunnar á Menningarnótt og flutti lagið þar eins og sjá má hér fyrir neðan.





Formanni SAF er ekki skemmt og segir að fyrir börn, sem hún er sannfærð um að hlusti á þennan tónlistarmann, 13 ára gamall sonur hennar þekki hann í það minnsta, þá gæti þetta virkað eftirsóknarvert, skemmtilegt og eðlilegt.

„Upphafning vímuástands. Því miður hafa alltof margir kynnst afleiðingum þess af því að vera reglulega „freðinn“ og óþarfi að fara nánar út það hér.“

Bjarnheiður segist vera sér meðvituð um rit- og tjáningarfrelsi og viti vel að börn og unglingar hafa greiðan aðgang að hverju sem er á netinu.

„En í gær var þessi eflaust ágæti listamaður að syngja snemma kvölds á fjölskylduskemmtun, sem var sjónvarpað beint á RUV, sem óneitanlega gefur atriðinu vægi og „normaliserar“ það á vissan hátt. Hvernig á að útskýra fyrir börnum að boðskapurinn sem þessi marglofaði og vinsæli listamaður flytur sé vondur? Hvernig samræmist þetta forvarnarstarfi? Eða finnst fólki þetta almennt bara allt í lagi?“ spyr Bjarnheiður og fær svörin á sinni síðu: Nei, segja flestir sem leggja orð í belg á síðu hennar.

Arnar Eggert segir Bjarnheiði vaða villu og svíma

Vísir reyndi að ná tali af Auði nú í morgun vegna þessa en hafði ekki erindi sem erfiði. Þannig að engar afsakanir eru í boði úr þeim ranni. Auður hefur reyndar þá stefnu að veita ekki viðtöl.

Bjarnheiður vitnar í umræddan texta sem fór svo fyrir brjóstið á henni og öðrum.

Þegar ég er freðinn (þegar ég er freðinn, þegar ég er freðinn)

Hugsa til þín svona í miðri vímu (í miðri vímu, í miðri vímu)

Ég hugsa alltaf um þig þegar ég er freðinn (þegar ég er freðinn, þegar ég er freðinn)

Hugsa til þín svona í miðri vímu (í miðri vímu, í miðri vímu).



Arnar Eggert Thoroddsen er hvorki meira né minna en doktor í dægurtónlistarfræðum. Hann gefur sannast sagna ekki mikið fyrir málflutning Bjarnheiðar í samtali við Vísi. Segir þetta nánast sögu dægurtónlistar, að fólk hafi verið að fárast yfir siðspillandi áhrifum hennar á ungdóminn.

Fagnar því að RUV sendi út tónlist Auðar

„Ég veit að á plötu sinni Afsakanir er hann sem listamaður að lýsa ákveðinni sögu, sem fjallar um jákvæða hluti og neikvæða hluti; hversdag ungs fólks. Hann er síst að hvetja ungt fólk til eiturlyfjaneyslu. Ef fólk myndi nú taka sig til og hlusta á þessa plötu hans myndi það líkast til komast að þeirri niðurstöðu að meiri líkur en minni eru á því að þeir sem hlusti hætti eiturlyfjaneyslu frekar en að það hefji hana. Ég fagna því að RUV hafi einmitt sent út frá tónlist þessa unga manns, ef eitthvað er er þetta þjóðþrifaverk og lýðheilsumál.“

Arnar Eggert segir einnig að fólk eigi það til að flækja sig of mikið í tali um fyrirmyndir, eins og einstaklingurinn sé gapandi einfeldningur sem taki öllu fyrirvaralaust. Og svo sé til, í allri frásagnarlist, nokkuð sem heitir sögumaður. Þó eitthvað sé sagt er ekki þar með sagt að það sé boðskapur höfundar.

„Frelsi listamannsins til að spegla samfélagið og túlka það og tjá sig um það. Það verður að vera skýrt.“

 

Fráleitt að Auður sé að tala fyrir fíkniefnaneyslu

Arnar Eggert segir að eitt sé víst að ekki breytist og það sé tuð í eldra fólki. „Það hefur alltaf verið og verður alltaf. Það er ljóst. Já, þetta getur verið þreytandi en fylgir þessu mannlífi. En, Auður kemur frá mjög flottum stað; platan öll kemur frá hárréttum vinkli með þetta allt saman. Og fráleitt að telja að hann sé að tala fyrir fíkniefnaneyslu.“

Dagskrárstjóri Rásar 2, sá sem ber meginábyrgð á því að útvarpa hinum meintu ósköpum, er Baldvin Þór Bergsson. Hann bendir á svipuð atriði og Arnar Eggert.

Ekki hægt að ritskoða listamenn

„Popptextar hafa frá fyrstu tíð verið umdeildir og oftar en ekki vakið hörð viðbrögð. Bubbi Morthens hefur til dæmis sungið mikið um vímu en að sama skapi hefur hann verið duglegur í seinni tíð að vekja athygli á skaðsemi neyslu. Margir af þeim listamönnum sem eru vinsælir í dag semja um neyslu og þann lífsstíl sem þeir velja,“ segir Baldvin Þór í samtali við Vísi.

Hann segir að um leið og við samþykktum ekki þann lífsstíl getum við ekki heldur ritskoðað listamenn eða lokað augunum fyrir þessum veruleika.

„Þess vegna fjöllum við reglulega um skaðsemi eiturlyfja í okkar þáttum. Þá má vekja sérstaka athygli á þáttunum Rabbabari á RÚV núll en þar tala vinsælustu listamenn unga fólksins mjög opinskátt um þessa hluti og vara mjög við afleiðingum neyslu.“