Tveggja leitað vegna bruna við lögreglustöðina: Bíllinn geymdi hugsanlegt þýfi

Lögreglan leitar tveggja manna vegna bíls sem brann á bílastæði lögreglunnar á Hverfisgötu síðastliðið föstudagskvöld. Er grunur um að kveikt hafi verið í bílnum sem lögreglan hafði lagt hald vegna gruns um að í honum væri hugsanlegt þýfi.

Tilkynningin um eldinn barst slökkviliðið á tíunda tímanum síðastliðið föstudagskvöld. Bíllinn var alelda þegar slökkvilið kom á staðinn og sást reykmökkurinn nokkuð greinilega víða um höfuðborgarsvæðið.

Um var að ræða um það bil tuttugu ára gamla Suburu-bifreið sem lögreglan hafði tekið eftir að hafa stöðvað ökumann hennar vegna gruns um akstur undir áhrifum lyfja í síðustu viku. Við skoðun á bílnum fundust munir sem lögregla hafði grunsemdir um að gæti verið hugsanlegt þýfi.

Jóhann Karl Þórisson, aðstoðaryfirlögregluþjónn á höfuðborgarsvæðinu, segir bílinn hafa verið færðan á lögreglustöðina við Hverfisgötu þar sem hugsanlegt þýfi var fjarlægt úr honum og var framkvæmd frekari leit í bílnum.

Að því loknu var eiganda bílsins tilkynnt að hann hefði tvo daga til að sækja bílinn, ef hann myndi ekki vitja bílsins eftir tvo daga þá yrði honum fargað.

„Bíllinn var á leiðinni upp í Vöku,“ segir Jóhann Karl.

Lögreglan skoðaði upptökur úr eftirlitsmyndavélum við lögreglustöðina á Hverfisgötu og sáust þar tveir menn sem lögreglan vill finna og ná tali af. Ekki er vitað hvernig var kveikt í bílnum.