Glódís skoraði tvö í stórsigri

Landsliðsmiðvörðurinn Glódís Perla Viggósdóttir skoraði tvö af mörkum Rosengård í stórsigri á Kungsbacka í sænsku úrvalsdeildinni í fótbolta í dag.

Nathalie Björn kom heimakonum í Rosengård yfir strax á níundu mínútu leiksins en gestirnir jöfnuðu stuttu seinna.

Glódís Perla kom Rosengård yfir á ný á 25. mínútu og gerði svo annað mark sitt, þriðja mark Rosengård, stuttu fyrir hálfleik.

Heimakonur völtuðu svo yfir Kungsbacka í seinni hálfleik, gerðu þrjú mörk og unnu 6-1 sigur.

Rosengård er á toppi deildarinnar með 20 stig eftir níu leiki en Kungsbacka situr á botninum án sigurs og aðeins með eitt stig.