Kolbeinn í liði umferðarinnar í Svíþjóð

Kolbeinn Sigþórsson minnti rækilega á sig um síðustu helgi þegar hann skoraði tvö mörk í 3-0 sigri á Elfsborg í sænsku úrvalsdeildinni. 

Þetta voru fyrstu mörk Kolbeins í langan tíma. Þetta var jafnframt annar leikur hans í byrjunarliði síðan hann gekk í raðir sænsku meistaranna.

Skilaði frammistaðan honum sæti í liði 15.umferðar Allsvenskan hjá sænska dagblaðinu Expressen.

Ærið verkefni bíður Kolbeins og félaga í kvöld þar sem þeir taka á móti Ararat frá Armeníu í undankeppni Meistaradeildar Evrópu en Armenarnir unnu fyrri leikinn 2-1.