Wellington selur í Eimskip

Tveir sjóðir á vegum bandaríska sjóðastýringarfyrirtækisins Wellington Management hafa minnkað hlut sinn í Eimskipi úr 2,8 prósentum í 0,7 prósent frá því í febrúar.

Annar sjóðurinn átti 0,6 prósent og hefur selt allan hlut sinn. Hluthafalisti flutningafyrirtækisins hafði ekki verið uppfærður frá 8. febrúar fyrr en nú við upphaf júlímánaðar.

Birta lífeyrissjóður, sem er fimmti stærsti hluthafi Eimskips, jók við eign sína úr 4,5 prósentum í 5,8 prósent, samkvæmt hluthafalistunum.

Á umræddu tímabili lækkaði gengi Eimskips í Kauphöll um átta prósent en Úrvalsvísitalan hækkaði um 18 prósent.