Anton bætti tíu ára gamalt Íslandsmet

Anton Sveinn McKee sló í dag tíu ára gamalt Íslandsmet í 50 metra bringusundi þegar hann tók þátt í móti í Bandaríkjunum.

Anton Sveinn synti á 27,73 sekúndum og bætti þar með Íslandsmet Jakobs Jóhanns Sveinssonar frá árinu 2009. Gamla metið var 28,03 sekúndur.

Með tímanum tryggði Anton sér einnig þátttöku á HM í Suður-Kóreu í 50 metra bringusundi en hann náði á dögunum að synda undir HM lágmarkinu í 100 metra bringusundi á sama móti.

HM fer fram í júlí en áður að því kemur mun Anton keppa fyrir Íslands hönd á Smáþjóðaleikunum í Svartfjallalandi í lok mánaðar.