Föstudagsplaylisti Ingibjargar Turchi

Ingibjörg Elsa Turchi er einn harðsvíraðasti bassafantur landsins og hefur farið um víðan völl á ferli sem er furðu langur miðað við aldur hennar.

Hún hefur jafnframt komið víða við á tónlistarrófinu, spilað indí-vögguvísur með Rökkurró, diskóslagara með Boogie Trouble og myndræna spunatónlist undir eigin nafni, svo örfá dæmi séu nefnd.

Árið 2017 kom út stuttskífa úr hennar smiðju sem nefnist Wood/Work, á vegum íslensku grasrótarútgáfunnar SMIT Records.

Lagalisti Ingibjargar er sólríkur og dansvænn og því tilvalinn förunautur inn í fyrstu sumarhelgi ársins.