Svona mun Formúlan líta út í ár

Nú hafa níu af þeim tíu Formúlu 1 liðum sem keppa munu í ár afhjúpað nýju bíla sýna. Aðeins Alfa Romeo á eftir að frumsýna sinn bíl en liðið mun gera það er fyrstu prófanir fyrir komandi tímabil hefjast á mánudaginn.

Mercedes hefur ökumanns- og bílasmiðatitil að verja. Þó hefur liðið engan veginn slakað á og tók meðal annars 16 mánuði að hanna W10 bílinn. 

„Ég er tilbúinn í slaginn,“ sagði fimmfaldi heimsmeistarinn Lewis Hamilton er hann ók W10 bílnum í fyrsta sinn í vikunni.

Ferrari hefur þurft að sætta sig við annað sætið á eftir Mercedes síðastliðin ár. Bíllinn sem liðið vonar að loksins muni sigra silfurörvarnar kallast SF90, til að fagna 90 ára afmæli ítalska bílaframleiðandans.

Red Bull mun notast við Honda vélar í fyrsta skiptið í ár. Liðið hefur oft kynnt bíla sína til leiks með sérstöku útliti og engin breyting var á því í ár. 

Red Bull bílarnir verða þó með svipað útlit og síðastliðin ár þegar kemur að fyrstu umferð mótsins í Melbourne í mars.

Renault heldur sér við svörtu og gulu litasamsetninguna. Liðið freystar þess að RS19 bíllinn, með Daniel Ricciardo innanborðs, muni koma liðinu nær slagnum um efstu þrjú sætin í keppni bílasmiða.

Haas var fyrst liða til að kynna nýjan bíl til leiks. Liðið hefur breitt útliti bílsins verulega frá því í fyrra, nú er aðalstyrktaraðili liðsins orkudrykkjaframleiðandinn Rich Energy. Því er litasamsetning VF-19 bílsins svört og gulllituð.

McLaren er að byrja sitt annað ár með Renault vélar en gengi liðsins hefur verið frekar lélegt síðastliðin sex ár.

MCL34 bíllinn á að koma liðinu aftur á beinu brautina með þeim Carlos Sainz og ungstirninu Lando Norris undir stýri.

Nú er Force India liðið úr sögunni og í þess stað kemur Racing Point. 

Liðið heldur þó svipuðu útliti og styrktaraðilum og Force India gerði á síðastliðnu ári. Lawrence Stroll, eigandi liðsins og faðir ökuþórsins Lance Stroll, segist ætla að koma liðinu á toppinn innan tíu ára.

Rétt eins og McLaren að þá mun Toro Rosso liðið mæta til leiks með tvo nýja ökumenn. Daniil Kvyat snýr aftur í Formúlu 1 og liðsfélagi hans, hinn 22 ára Alexander Albon, verður aðeins annar tælenski ökumaðurinn í sögu íþróttarinnar.

Williams gekk hræðilega á síðasta ári. Liðið hefur alls 16 heimsmeistaratitla í Formúlu 1 en lauk síðasta tímabili í neðsta sæti. Í ár hefur liðið nýtt útlit og nýjan aðalstyrktaraðila, Rokit.

Eins og áður sagði þá mun Alfa Romeo frumsýna sinn bíl á mánudaginn. Ítalski bílaframleiðandinn keypti Sauber liðið í vetur.

Það hafa þó borist myndir af bílnum, þó hann hafi ekki verið formlega kynntur til leiks enn.

Now we’re ready to go. Feeling excited too?#AlfaRomeoRacing#LoveAtFirstSight#ARRpic.twitter.com/gskcT9grRp

— Alfa Romeo Racing (@SauberF1Team) February 14, 2019

Kimi Raikkonen, 39 ára aðal ökuþór liðsins, hefur þó keyrt nýja bílinn nokkra hringi. Alvöru prófanir liðanna hefjast svo á mánudaginn á Barcelona brautinni á Spáni.