Dortmund vann uppgjör toppliðanna

Borussia Dortmund tók á móti Borussia Mönchengladbach á Westfalen leikvangnum í uppgjöri toppliðanna í þýsku úrvalsdeildinni í kvöld. Sex stig skildu liðin að þegar kom að leiknum í kvöld, Dortmund á toppnum en Gladbach í öðru sæti, með jafnmörg stig og ríkjandi meistarar Bayern Munchen.

Enska ungstirnið Jadon Sancho kom heimamönnum yfir skömmu fyrir leikhlé en Christoph Kramer sá til þess að liðin færu með jafna stöðu í leikhlé þar sem hann jafnaði í uppbótartíma fyrri hálfleiks.

Það var svo Marco Reus, á móti sínum gömlu félögum, sem sá til þess að Dortmund náði níu stiga forystu á toppi deildarinnar því hann skoraði sigurmarkið snemma í síðari hálfleik. Lokatölur 2-1 fyrir Dortmund.