Frá Selfridges út á Ægisíðu

Þetta eru sýnishorn sem hafa ekki farið í framleiðslu þannig að þetta eru einstakir skór ásamt eldri stílum,“ segir Katrín Alda Rafnsdóttir sem er hönnuðurinn á bak við íslenska skómerkið KALDA. Hún verður með svokallaða „sample sale“ á morgun frá klukkan 14-18 á Ægisíðu 74 þar sem skó­parið kostar frá 8.000 krónum.

Skórnir hennar Katrínar hafa slegið í gegn víða um heim og fást meðal annars í Harvey Nichols og Browns í London. Nýverið samdi hún við Selfridges sem er önnur stærsta verslunin á Bretlandi á eftir Harrods. Hún er því vön örlítið meiri glamúr en þeim sem verður á Ægisíðunni á morgun en hún ætlar að bjóða upp á jólaglögg, piparkökur og góða skapið að sjálfsögðu.

„Ég er ekki að fara að selja neitt drasl. Ég bý til fjórar línur á ári og sel þær erlendis aðallega. Þegar maður er með svona lítið fyrirtæki þá pantar maður bara það sem búðirnar vilja. Maður býr kannski til 50 stíla en aðeins 10 fara í framleiðslu. Hitt er ekkert framleitt en það eru margar stærðir í boði.“

Selfridges-samningurinn var handsalaður á síðustu tískuviku sem Katrín tók þátt í og fara skórnir upp í hillur verslunarinnar snemma á næsta ári. Hún er því komin hingað heim í jólafrí. „Ég er að sjálfsögðu með rjúpur. Ég er frá Þórshöfn og skýt yfirleitt mínar eigin en ég komst ekki þetta árið vegna anna. Svo pabbi er að koma með jólamatinn suður yfir heiðar.“