Bergþór og Gunnar Bragi mættu ekki í veisluna

Bergþór Ólason og Gunnar Bragi Sveinsson, þingmenn Miðflokksins, voru ekki á meðal gesta í veislu forsetahjónanna á Bessastöðum í gærkvöldi. Ekki liggur fyrir hvers vegna þeir mættu ekki en fyrr um daginn sagðist Gunnar Bragi stefna á mætingu.

Bergþór hefur ekki tjáð sig síðan að kvöldi miðvikudags en á Klaustursupptökunum fer hann ófögrum orðum um kollega sína á Alþingi, aðallega þingkonur. 

Gunnar Bragi sagðist í samtali við fréttastofu í gær ætla að mæta í hina árlegu veislu á Bessastöðum. Hann vonaði að orð þingmannanna að kvöldi 20. nóvember á Klaustur yrðu ekki til þess að aðrir þingmenn mættu ekki.

Sagðist Gunnar Bragi að öllum líkindum ekki ætla að snerta áfengi um kvöldið.

Sigmundur Davíð Gunnlaugsson, formaður Miðflokksins, mætti í veisluna en hann var á samkomunni á Klaustri sem náðist á upptöku.

Hvorki hefur náðst í Bergþór Ólason, Gunnar Braga né Steingrím J. Sigfússon í gærkvöldi né í morgun vegna málsins.

Uppfært klukkan 11:04

Í fyrri útgáfu fréttarinnar hafði Vísis eftir heimildum að forseti Alþingis hefði tilkynnt þingmönnunum tveimur að nærveru þeirra væru ekki óskað. Það var ekki rétt og er beðist velvirðingar á þessu.

Steingrímur J. Sigfússon, forseti Alþingis, segir í skriflegu svari við fyrirspurn Vísis að hann hafi ekki átt nein samskipti við Bergþór og Gunnar Braga varðandi veisluna á Bessastöðum.

Þá segir Örnólfur Thorsson forsetaritari ekki vita til þess að forseti hafi haft nokkuð með það að gera að fyrrnefndir þingmenn mættu ekki til veislu.