Innkalla nýlega Opel

Bílabúð Benna, að beiðni bílaframleiðandans Opel, hefur ákveðið að innkalla 88 bifreiðar af gerðinni Opel Astra af árgerðunum 2016 og 2017. Auk þess mun Bílabúð Benna þurfa að innkalla 18 Opel Mokka bifreiðar af árgerðunum 2017 og 2018. Umræddar bifreiðar eru allar með 1.4 lítra bensínvélar.

Á vef Neytendastofu segir að ástæða innköllunarinnar sé sú að gangtruflanir gætu gert vart við sig við akstur á bílunum. Viðgerðin felist í því að vélartölva bifreiðanna er uppfærð, eigendum að kostnaðarlausu.

Neytendastofa segir jafnframt að eigendum bílanna verði tilkynnt um innköllunina bréfleiðis. Nánari upplýsingar um málið er hægt að nálgast hjá þjónustufulltrúum í verkstæðismóttöku Bílabúðar Benna ehf.