Fan Bingbing mynduð á almannafæri í fyrsta sinn eftir hvarfið

Kínverska kvikmyndastjarnan Fan Bingbing sást í fyrsta sinn á almannafæri síðan hún hvarf sporlaust fyrir þremur mánuðum síðan. Myndband, sem sagt er sýna leikkonuna á ferli í Peking, var birt á kínverska fjölmiðlinum Baidu News og fór í kjölfarið í dreifingu á kínverska samfélagsmiðlinum Weibo.

Síðast sást til Fan þann 1. júlí síðastliðinn en þá hafði hún nýlega verið sökuð um undanskot frá skatti. Ekkert hafði svo heyrst frá henni á Weibo síðan 23. júlí. Fan rauf að endingu þögnina og sendi frá sér yfirlýsingu í byrjun október þar sem hún sagðist hafa „brugðist þjóð sinni“ en þá hafði ríkisfjölmiðillinn Xinhua greint frá því að hún skuldaði því sem nemur ellefu milljörðum íslenskra króna í skatt.

Bandaríska fréttastofan CNN birti í dag hluta myndbandsins en í því sést Fan yfirgefa alþjóðaflugvöllinn í Peking á mánudagskvöld, ásamt fylgdarliði. CNN hefur þó ekki fengið staðfest að Fan sé konan í myndbandinu.

Hvarf Fan vakti athygli heimsbyggðarinnar og höfðu nokkrar kenningar verið settar fram um afdrif hennar. Sumir höfðu haldið því fram að hún hafi verið í haldi kínverskra yfirvalda á meðan aðrir fullyrtu að hún hefði flúið til Los Angeles til að sækja um hæli í Bandaríkjunum.