Chiesa fer í mál við Conor McGregor

Þó svo Conor McGregor sé búin að útkljá sín mál gagnvart dómstólum í Bandaríkjunum vegna árásarinnar í Brooklyn þá er hann ekki laus allra mála. Einn af þeim sem meiddust í árásinni er nefnilega farinn í mál við Írann.

Það er Michael Chiesa en hann skarst í andliti eftir að Conor hafði brotið rúðuna í rútu bardagakappanna í Brooklyn. Chiesa meiddist svo mikið að hann gat ekki barist gegn Anthony Pettis tveimur dögum síðar. Ray Borg meiddist einnig í árásinni og gat ekki barist. Hann gæti einnig farið í mál.

Chiesa fer í mál við Conor, félaga hans sem tóku þátt, fyrirtæki Conors og Barclays Center vegna þessarar árásar. Hann vill fá bætur vegna árásar og vanrækslu meðal annars.

Þessu máli verður því ekki lokið nema Chiesa fái skaðabótagreiðslu sem hann sættir sig við.