Ákærð fyrir að ljúga til um gæði stáls

Japanska stálframleiðslufyrirtækið Kobe Steel hefur verið ákært fyrir brot á samkeppnislögum.

Forsvarsmenn fyrirtækisins játuðu að logið hafði verið til um styrk og gæði vara sem seldar voru til hundruð vðiskiptavina.

Kobe Steel er þriðji stærsti stálframleiðandi Japans og sér ýmsum bíla- og flugvélaframleiðendum fyrir efni. Stórfyrirtæki líkt og Boeing, Toyota og General Motors hafa rannsakað hvort ófullnægjandi efni hafi verið notuð við framleiðslu hjá þeim en ekki hefur enn verið tilkynnt um slíkt.

Í yfirlýsingu sem Kobe Steel sendi frá sér í gær biðst fyrirtækið afsökunar á blekkingarleiknum. Búið er að afhjúpa 688 tilfelli þar sem augljóst þykir að brögð hafi verið í tafli. Tilfellin eru sögð hafa sýnt fram á hvernig starfsmenn fyrirtækisins breyttu eða skálduðu upplýsingar um gæði varanna sem Kobe Steel seldi til fjölþjóðlegra viðskiptavina sinna.

Framkvæmdastjóri Kobe Steel hefur sagt af sér vegna málsins og málsóknir gegn fyrirtækinu eru í undibúningi í Bandaríkjunum og Kanada.