Muscleboy kennir víkingaklappið

Lagið er unnið í samstarfi við þýsku rafgrúppuna Bodybangers. Egill biðlaði til íslensku þjóðarinnar að senda inn skemmtilegar víkingaklapps-klippur og þjóðin varð heldur betur við kallinu. „Auðvitað heyrði ég í mínum helstu aðdáendum en ég bað um að mér yrðu sendar klippur og það hrúguðust inn myndbönd frá öllu landinu, allt frá eins árs börnum til gamals fólks. Það tóku allir höndum saman,“ segir Egill sem staddur er í Rússlandi.

Þýsku drengirnir eru miklir aðdáendur Víkingaklappsins og íslenska landsliðsins. Þeir hringdu í Egil sem hikaði hvergi og hlóð í. „Þetta er verkefni sem fæddist með engum fyrirvara. Bodybangers höfðu samband, hringdu bara og báðu mig um þetta. Glerharðir. Það þarf ekkert að kenna Þjóðverjum að gera takt í Euro-poppinu og ég gat því séð um kómedíuna.“

Myndbandið er klippt hratt og fjölmargar íslenskar stórstjörnur taka þátt. Aðallega með innsendum myndböndum. Gísli Örn Garðarsson kemur þó sterkur inn en það var tilviljun. „Gísli er auðvitað einn harðasti Muscleboy aðdáandi sem þú finnur. Málið er að ég var að taka upp hestaatriði og vildi fá hlöðuatriði með. Einn meistari segir þá við mig, Gísli á helvíti flotta hlöðu. Kíkjum þangað. Ég hef aldrei séð jafn sexí hlöðu á ævinni. Hún var upp á 10,5. Þetta lítur út eins og ég hafi verið búinn að undirbúa þetta en ég sver, þegar ég labbaði inn var besti leikari landsins að greiða hestinum sínum. Ég sagði honum hvað ég væri að gera og hvort hann væri ekki til í smá glens. Það var einfalt svar frá kónginum; Hvað heldur þú! Þetta lúkkar eins og hann sé á launaskrá en þetta fæddist á staðnum. Það er svoleiðis,“ segir Egill stoltur.