Heimir setti töskuna í vitlausa rútu sem seinkaði brottför strákanna til Rússlands

Brottför íslenska landsliðsins í knattspyrnu til Rússlands seinkaði um nokkrar mínútur í morgun, eins og áður hefur verið greint frá.

Í fyrstu var talið að pappírsvinna hefði tafið fyri brottför en Heimir Hallgrímsson, þjálfari, greindi frá því að ástæðan fyrir því að brottför seinkaði var að hann setti töskuna sína í vitlausa rútu.

„Ég var að flýta fyrir í morgun og setti töskuna mína í vitlausa rútu, sem fór upp á Skaga. Þess vegna erum við að fá okkur kaffi núna og bíða í nokkrar mínútur,“ sagði Heimir í samtali við Rúv.

„Seinkunin er því um að kenna að þjálfarinn setti farangurstösku sína í vitlausa rútu. En eigum við ekki að segja að fall sé fararheill. Þetta var góður brandari fyrir Sigga Dúllu (búningastjóra) og félaga. Það er búið að hlæja mikið,“ sagði Heimir.