Mads Mikkelsen sagði ekki umboðsmönnum sínum frá því að hann væri á leið til Íslands til að taka upp mynd

Danski leikarinn Mads Mikkelsen sagði ekki umboðsmönnum sínum frá því að hann væri á leið til Íslands til að taka upp kvikmynd.

Mikkelsen er aðalleikari myndarinnar sem var frumsýnd á kvikmyndahátíðinni í Cannes í vikunni. Með annað hlutverk myndarinnar fer leikkonan María Thelma Smáradóttir sem á að baki leik í þáttaröðinni Föngum.

Mikkelsen og leikstjóri myndarinnar, Joe Penna, hafa verið í viðtölum til að kynna þessa „litlu“ mynd sem hefur vakið athygli.

Myndin heitir Arctic og segir frá manni sem er fastur á norðurheimskautinu. Hann á von á því að vera bjargað en þegar styttist í björgunina kemur slys í veg fyrir að af henni verði. Hann þarf að ákveða hvort hann eigi að halda til í búðum sínum þar sem hann er öruggur um sinn, eða leggja í mikla hættuför í von um að honum verði bjargað.

Mikkelsen og Penna ræddu gerð myndarinnar við bandaríska fjölmiðilinn L.A. Times en þar kemur fram að aðdragandi myndarinnar hafi verið afar skammur.

Daninn las handritið og átti svo tveggja klukkustunda samtal við leikstjórann í gegnum Skype á miðvikudegi. Tveimur dögum síðar hafði leikstjórinn hafið leit að tökustöðum á Íslandi og einum og hálfum mánuði síðar voru þeir mættir til Íslands til að taka myndina upp í apríl í fyrra.

„Þetta gerðist allt mjög hratt,“ segir Mikkelsen í samtali við L.A. Times. „Ég sagði umboðsmönnum mínum ekki frá því. Þeir komust að því á endanum,“ segir Mikkelsen. Hann segir þá hafa spurt hann hvers vegna hann væri á leið til Íslands og svaraði Mikkelsen að einungis væri um ferðalag að ræða.

Mikkelsen segir tökur þessarar myndar hafa verið þær erfiðustu á hans ferli en hann vann til verðlauna á kvikmyndahátíðinni Cannes fyrir leik sinn í dönsku myndinni Jagten árið 2012. Hann á einnig að baki leik í James Bond-myndinni Casino Royale og Stjörnustríðsmyndinni Rogue One.

Joe Penna greinir frá því að myndin átti fyrst að fjalla um mann sem væri einn og yfirgefinn á plánetunni Mars. Nokkrir hlutir komu í veg fyrir að úr því yrði, þar á meðal stórmyndin The Martian með Matt Damon í aðalhlutverki.

Joe Penna er brasilískur og segir kuldann á Íslandi hafa reynst honum afar erfiður. Hann segist hins vegar hafa fengið fatnað sem var upphitaður með rafmagni, eitthvað sem leikstjórinn vissi ekki að væri til fyrr en hann kom til Íslands.

Tökur hér á landi stóðu yfir í 22 daga í fyrra og fóru fram við Nesjavelli og Fellsendavatn skammt frá Þórisvatni.

Íslenska fyrirtækið Pegasus og kvikmyndagerðarmaðurinn Einar Þorsteinsson eru á meðal framleiðenda.

Starfsliðið var nær eingöngu skipað Íslendingum. Tómas Örn Tómasson sá um kvikmyndatöku, Atli Geir Grétarsson og Gunnar Pálsson gerðu leikmynd, Margrét Einarsdóttir sá um búninga og Ragna Fossberg um förðun.

Hér fyrir neðan má sjá brot úr myndinni.