Gagnapakki Cambridge Analytica stærri en áður var talið

Einn yfirmanna Facebook segir gagnapakka umdeilda fyrirtækisins Cambridge Analytica hafi verið stærri en í fyrstu var talið. Upprunalega var talið að fyrirtækið hefði öðlast upplýsingar um 50 milljónir notenda Facebook með óheimilum þætti. Nú segir Facebook að upplýsingar snúi að 87 milljónum notenda, sem flestir séu frá Bandaríkjunum.

Í yfirlýsingu frá Mike Schroepfer segir að fyrirtækið vinni að því að takmarka aðgang aðila að upplýsingum um notendur. Þá segir hann að Facebook muni tilkynna notendum ef upplýsingar þeirra hafi verið í umræddum gagnapakka.



Facebook hefur mátt þola mikla gagnrýni upp á síðkastið eftir að í ljós kom að Cambridge Analytica, breskt greiningarfyrirtæki sem vann fyrir forsetaframboð Donalds Trump árið 2016, hafi komist yfir upplýsingar um milljónir notenda Facebook með óheimilum hætti. Svo virðist sem Facebook hafi vitað af svikunum frá árinu 2015 en ekki gengið á eftir því að gögnunum yrði eytt þar til erlendir fjölmiðlar bjuggu sig undir að birta umfjallanir um gögnin um miðjan mars á þessu ári.

Gagnrýnin hefur einnig komið frá þingmönnum víða um heim og mun Mark Zuckerberg, stofnandi Facebook, mæta fyrir þingnefnd þann 10. apríl og svara spurningum þingmanna.

Cambridge Analytica keypti gögnin í gegnum utanaðkomandi aðila sem sagði Facebook að hann væri að safna gögnum fyrir rannsóknir.

Aleksandr Kogan safnaði gögnunum meðal annars í gegnum snjalltækjaforritið thisisyourdigitallife. Hundruðum þúsunda aðila var greitt fyrir að nota forritið til að taka persónuleikapróf og var þeim sagt að gögnin yrðu notuð til rannsókna.

Auk þess að taka upplýsingar þeirra sem tóku áðurnefnt persónuleikapróf safnaði forritið einnig upplýsingum Facebookvina þeirra. Samkvæmt reglum Facebook var Kogan þó óheimilt að selja upplýsingarnar eða nota þær í öðrum tilgangi.

Forsvarsmenn Cambridge Analytica segjast hafa keypt upplýsingarnar af prófessornum í góðri trú.



Yfirvöld Bretlands, þar sem fyrirtækið er skráð, hafa tekið það til rannsóknar og sömuleiðis eru yfirvöld í Nígeríu að rannsaka aðkomu fyrirtækisins að kosningum þar í landi árið 2007 og 2015.