Sturla náði ekki að ljúka keppni

Sturla Snær Snorrason komst ekki í mark á Ólympíuleikunum í Pyeongchang í nótt þegar hann keppti í stórsvigi. Marcel Hirscher stóð uppi sem sigurvegari.

Sturla Snær keyrði útaf, en hann tók af stað númer 61 af þeim keppendum sem tóku þátt. Sturla hefur þó ekki lokið sér af því á fimmtudaginn keppir hann í svigi.

Marcel Hirscher kom fyrstur í mark eins og áður segir, en þetta voru hans fyrstu gullverðlaun í stórsvigi á Ólympíuleikum. Hann kom í mark rúmri sekúndu á undan Norðmanninum Henrik Kristoffersen.

Þriðji varð Frakkinn Alexis Pinturault, en Hirscher var fyrstur eftir fyrri ferðina. Kristoffersen náði aðeins að saxa á forskotið eftir fyrri ferðina, en ekki nóg og Hirscher verðugur sigurvegari.