Sjáðu geggjað mark Gylfa gegn gömlu félögunum

Gylfi Þór Sigurðsson skoraði sitt þriðja mark á tímabilinu í ensku úrvalsdeildinni er Everton vann 3-1 sigur á Swansea í kvöld.

Gylfi lék í kvöld í fyrsta sinn gegn sínu gamla félagi og hélt upp á það með glæsilegu marki um miðjan síðari hálfleikinn sem kom þeim bláklæddu í 2-1 forystu, eftir að Swansea hafði óvænt komist yfir í fyrri hálfleik með marki Leroy Fer.

Dominic Calvert-Lewin og Wayne Rooney skoruðu hin mörk Everton í leiknum og hefur liðið nú unnið fjóra af síðustu fimm leikjum sínum. Everton, sem var við fallsvæði deildarinnar fyrir fáeinum vikum, er komið upp í níunda sætið með 25 stig.

Gylfi Þór hefur verið öflugur með Everton í undanförnum leikjum og hét hann uppteknum hætti í kvöld. Samantekt úr leiknum má sjá hér fyrir neðan.