Teiknar upp raunhæfan möguleika fyrir Vinstri græn

Logi Einarsson, formaður Samfylkingarinnar, og Inga Sæland, formaður Flokks fólksins, hittust á óformlegum fundi í dag og ræddu hvað flokkarnir tveir ættu sameiginlegt. Með þessu teiknar Logi Einarsson upp raunhæfan möguleika fyrir þingflokk Vinstri grænna því ríkisstjórn Viðreisnar, Samfylkingar, Vinstri grænna, Pírata og Flokks fólksins hefði 32 þingmenn.

Bæði uppbyggingarverkefni og pólitískur stöðugleiki

„Hvað er það sem við ætlum að ná með nýrri ríkisstjórn? Ætlum við bara að fara í uppbyggingarverkefni eða ætlum við líka glíma við þennan pólitíska óstöðugleika sem hefur orðið hér vegna trúnaðarbrests, spillingar og leyndarhyggju? Þessu tvennu gætum við náð með þessari stjórn sem ég er að teikna upp,“ segir Logi í samtali við Vísi. Hann segist telja að Vinstri græn nái miklu frekar fram sínum málefnum í slíkri stjórn.

„Ég freistast til þess að trúa því vegna þess að í mjög mörgum atriðum erum við sammála VG þegar kemur að ríkisfjármálum en ég ætla ekkert að gefa mér hvað þau ná út úr hinu, það er þeirra verkefni og ég óska þeim auðvitað alls hins besta í því, fyrir samfélagið. Ég væri ekki að teikna þessa mynd upp nema af því ég tel að hún sé betri fyrir samfélagið,“ segir Logi.

Fleiri en einn ás sem skiptir máli til að ná fram breidd

Logi segir að vænlegasta ríkisstjórnarmynstrið feli í sér samstarf með Vinstri grænum, Viðreisn, Pírötum, Flokki fólksins og Framsókn því slík ríkisstjórn hefði fjörutíu þingmenn.

En gengi að hafa Viðreisn og Framsókn saman í stjórn ef tekið er mið af þessum „frjálslynda ási“ sem mönnum eru svo tíðrætt um?

„Mig minnir nú að menn hafi talað um breiðar ríkisstjórnir og þá verða menn að horfa á fleiri ása en bara hægri, vinstri. Þá verða menn að horfa á breiddina. Hvaða leið er líklegust til að búa til sátt í samfélaginu?“ segir Logi sem tekur mið af málflutningi Sigurðar Inga Jóhannssonar, formanns Framsóknarflokks sem talað hefur fyrir breiðri stjórn með það fyrir augum að skapa sátt.

„Hægri/vinstri ásinn er að mínu áliti feikilega mikilvægur núna, þegar við erum að horfa upp á aukna misskiptingu, fátækt barna og öryrkja og aldraðra en lausnirnar sem felast í því að ráðast gegn því geta líka leynst á hinum ásunum. Síðan er ömurlegt árið 2017 að við þurfum líka að díla við hluti eins og kynjaás. Vilja menn sjá ríkisstjórn og stjórnarmeirihluta sem er að miklum meirihluta skipaður körlum eða viljum við fá meira jafnrétti? Okkur er svo tamt að hugsa bara annað hvort í tvívíðum texta eða þrívíðum heimi en í stjórnmálum eru víddirnar miklu fleiri,“ segir Logi sem bendir á að ásarnir séu vissulega fleiri einn og ríkisstjórn með raunverulegri breidd feli í sér fleiri þætti en bara hægri og vinstri stjórnmál

Margir sameiginlegir fletir með Flokki fólksins

Aðspurður hvort einhver flötur hafi fundist á milli Samfylkingar og Flokks fólksins svarar Logi játandi. „Jájá, við höfum auðvitað bæði ástríðu fyrir auknum jöfnuði og okkur rennur til rifja misskipting og fátækt og kjör aldraðra og öryrkja þannig að við erum algjörlega samstíga í því hvað þarf að gera. Svo auðvitað greinir okkur hugsanlega á um hvernig og hversu hratt og best er að stíga þau skref, það er bara það sem gerist á milli flokka. Það getur ekki verið óyfirstíganlegra en það sem nú er verið að vinna að,“ segir Logi sem segir að það hafi verið gott að hitta Ingu og spjalla almennilega við hana.

Inga Sæland var stödd í vöfflukaffi á skrifstofu Flokks fólksins þegar blaðamaður Vísis náði tali af henni. Hún sagði að hennar flokkur væri mjög opinn fyrir öllum góðum verkum en að samtal hennar og Loga hefði verið óformlegt.

„Það er bara verið að þreifa á ýmsu. Það er ýmislegt annað í kortunum heldur en nákvæmlega það sem er í gangi núna. Það er möguleiki á ýmsu öðru. Það er bara spurning hvernig það síðan fer.“

Værir þú opin fyrir því að fara í viðræður með Samfylkingu, Vinstri grænum, Pírötum og Viðreisn?

„Eins og við sögðum fyrir kosningar og ég segi alltaf: Við erum opin fyrir öllu sem heitir góð verk. Við verðum að vinna góð verk. Við verðum að fara að taka utan um þá sem lakast standa í samfélaginu og hvað sem verður til þess að það verði gert mögulegt þá munum við ekki skorast undan því vegna þess að það er náttúrulega okkar áherslu-og stefnumál númer eitt,“ segir Inga sem segir að Katrín hljóti að sjá að það séu fleiri kostir í stöðunni.

Hrædd um velferðarmál og óttast stöðnun verði þriggja flokka ríkisstjórnin að veruleika

Inga segist vona að aðrir möguleikar verði skoðaðir en ríkisstjórn Framsóknar, Vinstri grænna og Sjálfstæðisflokks. „Þessi þriggja flokka stjórn sem nú er í smíðum, mér líst frekar þannig á að við gætum ekki vænst mikilla breytinga fyrir fólkið okkar og þá sem höllum fæti standa. Ég er bara hrædd um það að velferðin verði ekki eins mikið hugsjónamál fyrir þau eins og það er fyrir okkur. Ég er hrædd um að stöðnun verði ríkjandi. Við erum að sjá að inni í þessari stjórn eru þrír af þessum svokallaða fjórflokki og ég er mest hrædd um að það boði frekar stöðnun en hitt.“

Í stöðuuppfærslu Loga Einarssonar á Facebook segir hann að Vinstri græn eigi næsta leik. Hér að neðan er hægt að lesa stöðuuppfærsluna sem Logi ritaði eftir fund hans með Ingu.