Funda um Mugabe í dag

Enn er kallað eftir því að Robert Mugabe, forseti Simbabve, víki úr embætti. Búist er við því að hershöfðingjar kalli Mugabe á fund sinn í dag og reyni að fá hann til að segja af sér. Kaþólskur prestur mun gegna stöðu fundarstjóra. BBC greinir frá.

Ástand stjórnmála í Simbabve hefur verið eldfimt en búist var við því að Mugabe myndi segja af sér í kjölfar þess að her landsins tók völdin í vikunni. Allt kom þó fyrir ekki og Mugabe hefur enn ekki stigið til hliðar.

Auk hersins, sem Mugabe mun funda með í dag, hefur ungliðahreyfing Zanu-Pf, flokks Mugabe, kallað eftir afsögn forsetans og fordæmt bæði stuðningsmenn hans og eiginkonu, Grace Mugabe. Þá vill miðstjórn Zanu-Pf að forsetinn hætti sem formaður flokksins.

Þúsund Simbabvemanna tóku þátt í kröfugöngu í höfuðborginni Harare í gær og kröfðust þess að Mugabe segði af sér. Hann hefur gegnt embætti forseta Simbabve síðan landið fékk sjálfstæði frá Bretlandi árið 1980.