Vala Matt skoðar hár­tísku vetrarins

Í Íslandi í dag á Stöð 2 í kvöld fer Vala Matt í leiðangur þar sem hún skoðar hvaða hártíska hefur verið vinsælust í vetur.

Hvaða klippingar og hvaða hárlitir? „Það sem var skemmtilegast við þennan leiðangur var að allir voru sammála um það að allt væri í tísku. Klippingar og greiðslur færu bara eftir karakter hvers og eins. Vinsælasta hárgreiðslan virðist þó vera áfram léttliðað hálfsítt eða sítt hár hjá kvenfólkinu,“ segir Vala.

Þá komst Vala að því að pönkið er vinsælt og þar ráða skemmtilegir hárlitir ríkjum, svo sem grátt og bleikt. Í þættinum fær Vala einnig að kynnast því hvernig tónlistarkonan Ragga Gísla klippir sig og greiðir. „Þar kom ýmislegt skemmtilegt á óvart.“