Fólk beðið að fara varlega vegna heitavatnsleka í Vesturbæ

Rétt fyrir klukkan 16 í dag barst Veitum tilkynning um að heitt vatn streymdi af krafti upp á gatnamótum Hringbrautar og Bræðraborgarstígs. Mannskapur var þegar sendur á staðinn til að stöðva lekann, segir í tilkynningu frá Veitum sem send var út nú á fimmta tímanum í dag.

Reikna má með heitavatnsleysi víða í Vesturbæ á meðan gert verður við lögnina. Þá er fólk varað við slysahættu í grennd við lekann og beðið að gæta sérstaklega að því að börn séu ekki að leik á staðnum.

Vatnið er sjóðheitt og getur valdið mjög slæmum brunasárum við örsnögga snertingu við vatnið.

Starfsfólk Veitna biðst velvirðingar á óþægindum vegna þessa.

Uppfært klukkan 16:28:

Slökkviliðið sendi dælubíl á vettvang auk sjúkrabíls en heitt vatn hefur flætt inn í kjallara húsa í kring. Slökkviliðsmenn eru enn á vettvangi og þá sérstaklega við að passa upp á að fólk verði sér ekki að voða vegna heita vatnsins, sem er mjög heitt.

Ljóst er að nokkurt tjón hefur orðið vegna heitavatnslekans. Veitur biðja íbúa umræddra húsa að fara varlega þar sem vatnið getur verið sjóðheitt og valdið brunasárum við örsnögga snertingu, segir enn fremur í annarri tilkynningu frá Veitum.

Uppfært klukkan 18.25:

Starfsfólk Veitna hefur nú staðsett leku lögnina sem flæddi úr í Vesturbænum fyrr í dag. Reyndist hún vera undir Hringbraut. Mest af heita vatninu kom hins vegar upp á mótum Kaplaskjólsvegar og Víðimels og nálægum brunnum.

Búið er að einangra æðina með því að loka fyrir streymi beggja vegna við hana og hefur sú aðgerð ekki áhrif á afhendingu heits vatns til íbúa. Því ættu allir að vera komnir með heitt vatn en nokkra stund tekur að ná upp fullum þrýstingi á öllu svæðinu

Fyrstu fregnir gáfu til kynna að nokkurt tjón hefði orðið þegar heitt vatn flæddi í kjallara í grennd við bilunina. Svo virðist sem þær hafi ekki reynst á rökum reistar, enn sem komið er hafa engar beiðnir um aðstoð við dælingu borist slökkviliði.