Tilfinningar sem við höfum ekki fundið fyrir áður

Fyrsti sigur íslenska körfuboltalandsliðsins á Eurobasket lætur bíða eftir sér og eftir tvö þrjátíu stiga töp fyrir Pólverjum og Frökkum um helgina er fátt sem bendir til þess að hann náist á þessu Evrópumóti.

Jón Arnór Stefánsson átti sinn langbesta leik á mótinu og íslensku strákarnir stóðu vel í Frökkum í gær með frábærum fyrri hálfleik en það dugði skammt gegn einu besta körfuboltaliði heims. Þriðja leikinn í röð stungu mótherjarnir af í þriðja leikhlutanum og á endanum munaði 36 stigum á liðunum.

Jón Arnór kom inn í byrjunarliðið og skilaði 23 stigum. Hann skipti um gír frá því í fyrri leikjunum tveimur þar sem lítið gekk hjá kappanum.

Íslenska liðið stóð mun betur í mótherjum sínum á EM í Berlín fyrir tveimur árum en Jóni finnst það ósanngjarnt að bera EM í Helsinki saman við mótið í Berlín 2015.

„Ég held að það séu mistök að bera þetta saman við mótið í Berlín. Fyrir okkur alla að vera þar í fyrsta skiptið, með allar þessar tilfinningar þar sem við vorum að standa í þjóðum og fá svaka athygli. Allir voru klökkir eftir hvern einasta leik eftir að vera syngja með stuðningsmönnunum. Við erum bara hér og það er mótlæti. Við höfum alveg jafngott af því. Við þurfum að læra af því og höndla það,“ sagði Jón Arnór.

Nú eftir þrjá leiki er íslenska liðið ekki aðeins búið að tapa öllum þremur leikjunum sínum heldur öllum með samtals 95 stiga mun. Póllandsleikurinn var hins vegar leikur sem liðið taldi sig eiga möguleika á að landa langþráðum sigri.

„Við höfum aldrei upplifað svona vonbrigði áður sem lið. Við ætluðum að vinna, héldum að við gætum unnið og gerðum okkar besta. Það var ekki nóg. Eftir leikinn var eftirsjá og okkur langaði að spila leikinn aftur og allt svoleiðis. Þessar tilfinningar voru að poppa upp í gær sem við höfum ekki fundið fyrir áður,“ sagði Jón Arnór.

Það er erfitt að mæta í viðtal leik eftir leik og tala um enn eitt stóra tapið. Jón Arnór sinnir þó sínum skyldum með glæsibrag eins og hann er þekktur fyrir. Það gera líka liðsfélagar hans.

„Við höfum komist inn á tvö Evrópumót í röð og við höfum verið að vinna geggjaða leiki heima í Höllinni. Þessi skellur er erfiður þegar þú ætlar þér einhverja hluti alveg gríðarlega mikið. Við ætluðum okkur það í gær. Eins sætt og það er að ná markmiðinu þá er alveg hrikalega erfitt að bregðast hér öllum og sjálfum sér líka,“ sagði Jón.

Það má lesa það á reynslumeiri mönnum liðsins að umræðan um andleysi eða baráttuleysi innan liðsins hefur sært menn innan þess. Íslensku leikmennirnir eru höfðinu lægri en flestir mótherjar og glíma við NBA-leikmenn eða leikmenn úr sterkustu félagsliðum Evrópu. Það vissu allir að þetta yrði erfitt og lýjandi að glíma við þessa stóru og kraftmiklu menn.

„Mér fannst við koma til baka í dag. Mér fannst við vera frábærir í dag. Einhverjir spekúlantar geta hraunað yfir okkur en við leggjum okkur alltaf fram. Við börðumst eins og við gátum. Menn tala alltaf um eitthvað andleysi, en hvaða andleysi. Menn eru að leggja sig alla fram í þetta og við erum bara ekki betri en Frakkarnir. Þeir eru alltaf 30 stigum betri en við á hverjum einasta degi nema í einhverjum öskubuskuævintýrum,“ sagði Jón Arnór.

Hann ætlar að njóta tímans í Helsinki þótt verkefnið sé kannski of krefjandi fyrir íslenska liðið í dag. „Ég er að njóta þess að vera hérna. Þetta geta verið einir af mínum síðustu landsleikjum. Ég er svo þakklátur að fá að vera hérna. Spila með Íslandi og fyrir framan þessa áhorfendur. Þegar maður er hættur þessu þá á maður eftir að horfa til baka og hugsa: Djöfull var þetta gaman,“ sagði Jón Arnór að lokum.