Augsburg slegið út úr þýska bikarnum af 3. deildar liði

Alfreð Finnbogason og félagar í Augsburg fengu skell er þeir féllu úr leik í þýska bikarnum gegn Magdeburg á útivelli í dag en Alfreð lék allan leikinn í dag.

Flestir áttu eflaust von á því að lið Augsburg sem er á lokastigi undirbúnings fyrir Bundesliguna sem hefst um næstu helgi myndu vinna nokkuð sannfærandi.

Staðan var markalaus í hálfleik en á 87. mínútu kom Christian Beck heimamönnum yfir og stuttu síðar innsiglaði Tobias Schwede sigurinn fyrir heimamenn fyrir fullu húsi.

Gríðarlegt áfall fyrir Augsburg sem mætir Hamburger SV á útivelli um næstu helgi og verða að gera betur heldur en í dag þegar þeir féllu út á móti liði í 3. deild þýsku deildarkeppninnar.