Arnar Bill: Allir taka jafnmikla ábyrgð

Arnar Bill Gunnarsson, fræðslustjóri KSÍ, er einn af þremur njósnurum íslenska kvennalandsliðsins í fótbolta sem mætir Sviss í öðrum leik sínum á EM 2017 á morgun.

Verkefni Arnars fyrir mótið var að taka út svissneska liðið þannig það er ekkert sem hann veit ekki um mótherja morgundagsins. Vinnan sem var lögð í að taka út mótherjana var mikil.

„Við erum búin að vera að kíkja á svissneska liðið síðan við drógumst með því í riði. Ég er búinn að þvælast um Evrópu að elta þær. Á meðan við kepptum á Algarve-mótinu kepptu þær á móti á Kýpur og unnu það,“ segir Arnar Bill.

„Ég sá leiki á því móti, svo sá ég þær í Sviss og svo eigum við auðvitað upptökur af öllum leikjunum þeirra. Ég er búinn að sjá svona fimm eða sex leiki með eigin augum og svo allt að átta leiki á upptöku.“

Austurríki vann nokkuð óvæntan sigur á Sviss í fyrstu umferðinni. Svissneska liðið var eitt það heitasta í Evrópu fyrir nokkrum árum og vann þá stelpurnar okkar þrisvar sinnum.

„Þetta er svo rosalega jafnt. Austurríki er á þvílíkri uppleið eins og Sviss var fyrir tveimur til þremur árum, mjög erfitt að mæta þeim. Sviss er orðið stöðugra lið á meðan stuðið og stemmarinn er með austurríska liðinu,“ segir Arnar en hvernig fótbolta vill Sviss spila?

„Sviss vill helst vera með boltann. Þær leita mikið að sömu leikmönnunum; Bachmann og Dickermann. Þær vilja sprengja leikinn svolítið upp. Þetta er lið stútfullt af góðum leikmönnum sem spila með frábærum liðum. “

Starf Arnars er að skila ítarlegum skýrslum um leikfræði Sviss og leikmenn liðsins. Það fer því ansi mikil vinna hjá honum í þennan eina leik.

„Ég njósnaði líka fyrir karlaliðið á EM í fyrra. Þar tók ég út austurríska liðið og við unnum þann leik en það sem ég skilaði hjálpaði okkur ekkert gríðarlega mikið. Við vorum í vörn í 45 mínútur. Það sem ég kem með nýtist leikmönnum vel en leikfræðilega séð eru það leikmennirnir sem klára verkefið inn á vellinum,“ segir Arnar en líður honum betur eða verr eftir svona leik þar sem svo mikil vinna fór í þetta hjá honum?

„Það eru bara allir í þessu saman og allir taka jafnmikla ábyrgð á öllu,“ segir Arnar Bill Gunnarsson.

Ekki missa af neinu tengdu stelpunum okkar á EM 2017 í Hollandi. Íþróttadeild 365 er með öflugt teymi fréttamanna á mótinu og færir ykkur allar nýjustu fréttirnar af íslenska liðinu. Fylgdu okkur á Facebook og Twitter.