Ákærður fyrir brot gegn 12 ára stúlku í Hafnarfirði

Rannsókn á máli karlmanns sem grunaður er um kynferðisbrot gegn tólf ára barni, þegar hann braust inn á heimili fjölskyldunnar í Hafnarfirði í maí síðastliðnum, er lokið. Maðurinn hefur verið ákærður fyrir húsbrot, kynferðislega áreitni gegn barni, þjófnað og fíkniefnalagabrot. Sömuleiðis er hann ákærður fyrir blygðunarsemisbrot sem sagt er hafa átt sér stað degi áður.

Vaknaði við snertingu mannsins

Manninum er gefið að sök að hafa farið óboðinn inn í húsið aðfaranótt föstudagsins 5. maí síðastliðinn. Stúlkan kvaðst hafa vaknað við snertingu mannsins þar sem hann hafi staðið við rúm hennar. Hann hafi meðal annars strokið henni um bak, farið inn undir nærbol hennar og farið niður á mjöðm.

Stúlkan sagðist hafa reynt að færa sig fjær honum en hann þá skriðið upp í rúm til hennar og reynt að strjúka henni meira. Hún hafi þá náð að fara inn á baðherbergi og læsa að sér en að maðurinn hafi þá að opna hurðina utan frá, en henni tekist að læsa aftur að sér. Hann hafi svo farið inn í eldhús og þaðan úr húsinu.

Stúlkan sagðist hafa verið hrædd þegar atvikið átti sér stað og fram kemur í úrskurði héraðsdóms asð henni hafi liðið mjög illa við að ræða atvikið, hún hafi grátið og átt erfitt með að tjá sig.

Kannast við að hafa „klappað“ stúlkunni

Ákærði viðurkenndi í skýrslutöku lögreglu að hafa farið inn í hús eftir að kona, sem hann hefði hitt fyrr um kvöldið, hefði staðið við glugga og sent honum koss með vörunum. Hann hefið svo áttað sig á því að þetta væri ekki konan sem hann hefði hitt.

„Kvaðst hann hafa fengið fyrirboða eða sýn um að kona í húsinu hafi boðið honum að koma inn og því hafi hann farið inn í húsið,“ segir dómi héraðsdóms.  Þá sagðist hann ekki kannast við að hafa farið inn á baðherbergi stúlkunnar.

Grunur um fleiri brot

Maðurinn er einnig grunaður um blygðunarsemisbrot en hann er sakaður um að hafa farið upp að baðherbergisglugga og horft á hana þar sem hún stóð fáklædd og berbrjósta. Meint atvik átti sér stað 4. maí síðastliðinn. 

Maðurinn sagðist kannast við að hafa farið upp að umræddu húsi og horft inn um baðherbergisgluggann og séð þar konu, án þess að sjá að hún hefði verið fáklædd.

Þá hefur rannsókn á nokkrum öðrum málum á hendur manninum verið hætt, en hann var sakaður um annað brot sama dag og meint brot gegn stúlkunni átti sér stað, þann 5. maí. Jafnframt var rannsókn á máli sem kom upp 29. mars hætt, en brotin tvö vörðuðu ætluð kynferðisbrot og tilraun til húsbrota.

Maðurinn mun sæta gæsluvarðhaldi til 2. ágúst næstkomandi, en hann hefur verið í haldi frá handtöku 5. maí.