Jókerinn í Denver fær félaga undir körfuna

Denver Nuggets hefur samið við framherjann Paul Millsap um að leika með liðinu næstu þrjú árin.

Hinn 32 ára gamli Millsap kemur til Denver frá Atlanta Hawks sem hann hefur leikið með undanfarin fjögur ár. Millsap var valinn í stjörnulið Austurdeildarinnar öll árin sín hjá Atlanta.

Millsap er að hefja sitt tólfta tímabil í NBA-deildinni. Hann var valinn númer 47 af Utah Jazz í nýliðavalinu 2006.

Forráðamenn Denver vonast til að Millsap hjálpi serbneska miðherjanum Nikola Jokic, sem sló í gegn á síðasta tímabili, að verða enn betri. Þeir félagar ættu að vera illviðráðanlegir saman á næsta tímabili.

Millsap var með 18,1 stig, 7,7 fráköst og 3,7 stoðsendingar að meðaltali í leik á síðasta tímabili.