Bíll endaði úti í Ölfusá eftir eftirför lögreglu

Ökumaður bíls sem lögreglan veitti eftirför á Hellisheiði á leið austur í morgun, sem endaði úti í Ölfusá, er kominn á land. Hann var í framhaldinu fluttur af vettvangi í sjúkrabíl og til Reykjavíkur.

Maðurinn var með meðvitund samkvæmt upplýsingum frá lögreglunni á Suðurlandi þegar honum var bjargað en blóðugur að sögn sjónarvotta. Hann hafði verið á þaki bílsins úti í Ölfusá í töluverða stund.

Eftirför lögreglu hófst klukkan 09:56 í Ártúnsbrekku þar sem ökumaðurinn sinnti ekki stöðvunarmerkjum lögreglu, að því er fram kemur í tilkynningu. Eftirförinni lauk svo þegar fólksbíllinn sem maðurinn ók hafnaði í Ölfusá.

Maðurinn náði að koma sér út úr bílnum og upp á þak hans rétt undir Ölfusárbrúnni. Var Ölfusárbrú í framhaldinu lokað. Björgunarsveitarmenn komu línu til mannsins sem hann festi sig í á meðan reynt var að ná til hans á báti. Rétt fyrir klukkan ellefu var maðurinn kominn á fast land en björgunarsveitarmenn björguðu honum á báti.

 

Mikill viðbúnaður er á staðnum og fjöldi fólks fylgdist með björgunaraðgerðum. Auk lögreglu og björgunarsveita var stigabíll frá slökkviliðinu sendur á vettvang auk þess sem kranabíll er á vettvangi þar sem hífa á bílinn upp úr ánni.

Uppfært klukkan 11:23.



Myndband af björgunaraðgerðum í Ölfusá má sjá hér fyrir neðan.

Myndband af því þegar björgunarbátur siglir niður ána til móts við manninn má sjá hér fyrir neðan.