Sakaðir um kúgun: „Þetta eru hrein ósannindi og grófur rógur“

Finnur Árnason, forstjóri Haga og Guðmundur Marteinsson, framkvæmdastjóri Bónuss, vísa því algjörlega á bug að íslenskir framleiðendur hafi fengið skilaboð frá Högum um að ef þeir hyggist selja vörur sínar í nýrri verslun Costco í Kauptúni verði þeim kippt úr hillum Bónuss og Hagkaupa.

Viðskiptablaðið fullyrðir þetta í dag eftir nafnlausum heimildarmönnum sem segja eigendur rótgróinna fyrirtækja vera uggandi yfir stöðunni sem nú er uppi á íslenskum smásölumarkaði.

Í frétt VB er greint frá því að Hagar hafi tekið því fálega þegar Costco bauð íslenskum matvælaframleiðanda að selja vörur sínar í versluninni. Eftir að boð Costco spurðist út hafi fyrirtækinu borist símtal frá Högum þar sem forsvarsmönnum þess var tjáð að ef vörurnar yrðu seldar í Costco myndu þær ekki verða seldar í verslunum Haga.

Sjá einnig: Finnst ómálefnalegt að tala um okur og glæpamenn í tengslum við verðlag í Costco

Lögbrot, ósannindi og rógur

Finnur segir þetta fjarri sannleikanum. „Þetta eru hrein ósannindi og grófur rógur. Ef einhver framleiðandi, matvælaframleiðandi á Íslandi, telur sig hafa orðið fyrir einhverju svona í okkar samskiptum þá á hann bara að snúa sér til Samkeppniseftirlitsins milliliðalaust,“ segir Finnur í samtali við Vísi.

„Það er fráleitt að samskipti okkar við birgja séu með þessum hætti. Ég er eiginlega orðlaus.“

Gæti hafa verið einhver misskilingur í samskiptum Haga við íslenska framleiðendur?

„Það er enginn misskilningur í þessari frétt. Þetta eru hrein ósannindi og grófur rógur,“ segir Finnur. „Þetta er lögbrot sem er verið að saka okkur um. Ef einhver telur sig hafa orðið fyrir þessu þá er einföld leið að snúa sér til Samkeppniseftirlitsins.“

Selja það sem selst

Guðmundur hjá Bónus segir í samtali við Vísi að verslanir sínar muni aldrei, og hafi aldrei, tekið vörur úr sölu sem hafi selst vel - þó svo að þær séu einnig seldar hjá keppinautum keðjunnar.

Því sé fjarri sannleikanum að til standi að kippa vörum sem seldar séu í Costco úr hillum Bónuss.  

Rótgróin fyrirtæki eru að sama skapi sögð í VB í öngum sínum yfir því að Costco skuli selja vörur sem fáist víða á Íslandi, þar með taldar matvörur, undir kostnaðarverði. Það geti bandaríski smásölurisinn gert því hann sé ekki í markaðsráðandi stöðu á Íslandi.

Einn forsvarsmanna íslenskrar verslunar sagði í samtali við VB að Costco væri augljóslega að gera þetta til þess að fá neytendur inn í verslunina og kaupa vörur eða vörumerki, sem ekki væru fáanlegar í öðrum verslunum hérlendis. Álagningin á þær vörur væri auðvitað nokkur.