Gaupi kíkti í Húrra Reykjavík | Myndband

Sindri Snær Jensson mun standa í marki KR þegar liðið mætir FH í stórleik 5. umferðar Pepsi-deildar karla í kvöld.

Stefán Logi Magnússon, aðalmarkvörður KR, þurfti að gangast undir aðgerð á dögunum og verður frá keppni næstu vikurnar. Á meðan mun Sindri standa vaktina í marki KR.

Sindra er fleira til lista lagt en að verja skot en hann rekur verslunina Húrra Reykjavík á Hverfisgötu. Guðjón Guðmundsson kíkti í heimsókn til Sindra í Húrra Reykjavík í gær.

„Það er áskorun að spila alla leiki, sama hver andstæðingurinn er. En það er vissulega gaman fyrir mig að fá minn fyrsta leik á móti FH,“ sagði Sindri sem hefur leikið einn leik í sumar; bikarleik gegn Leikni F.

„Það er leiðinlegt að koma inn á þessum forsendum; að Stefán meiðist. En ég spilaði annan hvorn leik á móti Stefáni á undirbúningstímabilinu og spilaði gegn Leikni F. Ég er í mjög góðu standi,“ bætti markvörðurinn við.

Innslagið í heild sinni má sjá í spilaranum hér að ofan.