Til skoðunar að lengja opnunartíma tippsins

Það skýrist að öllum líkindum í dag hvort að opnunartími tippsins í Bolaöldum verði lengdur en fjallað hefur verið um það að verktakinn sem vinnur að framkvæmdunum á Miklubraut sé bundinn af opnunartíma tippsins þessa dagana þar sem hann þarf að komast í að losa sig við jarðveg. Tekið er á móti honum í tippnum.

Magnús Ólason, forsvarsmaður tippsins, segir í samtali við Vísi að hann sé nú að skoða hvort ekki sé hægt að lengja opnunartímann en það kæmi ekki aðeins verktakanum á Miklubraut til góða heldur einnig öðrum verktökum sem eru í framkvæmdum á höfuðborgarsvæðinu.

Að sögn Magnúsar þarf hann nú að skoða það með starfsfólki sínu hvort hægt sé að lengja opnunartímann en hann segist sjá fram á það að geta allavega haft opið til klukkan 18 á virkum dögum í staðinn fyrir 17:30. Tippurinn lokar svo klukkan 16 á föstudögum og er einnig lokaður um helgar en hann opnar klukkan 8 virka daga.

Björn Sigurðsson, eigandi og forstjóri Bjössa ehf., verktakafyrirtækisins sem vinnur að framkvæmdunum á Miklubraut segir að það muni um hvern hálftíma sem tippurinn er opinn lengur.

„Það myndi þó muna mest fyrir okkur ef það væri opið á laugardögum og okkur skilst að það sé verið að skoða það hjá þeim hvort hægt sé að hafa opið þá,“ segir Björn í samtali við Vísi.

Aðspurður hversu mikið er eftir af jarðvegsvinnu þeim megin Miklubrautar segir Björn að hann telji það vera í mesta lagi viku en þá farið í að malbika. Sams konar jarðvegsvinnu þarf síðan að fara í hinu megin á Miklubrautinni þegar framkvæmdir hefjast þar síðar í sumar.