Níu af tólf leikmönnum í karlalandsliðinu á Smáþjóðaleikunum í San Marínó eru nýliðar

Craig Pedersen mun ekki stýra íslenska karlalandsliðinu á Smáþjóðaleikunum í San Marínó og lykilmenn landsliðsins verða heldur ekki með á leikunum. Níu nýliðar eru í karlalandsliðinu en einn nýliði hjá konunum.

Búið er að velja þá tólf leikmenn sem munu skipa landslið Íslands, hjá konum og körlum, á Smáþjóðaleikunum, GSSE 2017, sem fara fram í San Marínó dagana 30. maí til 3. júní.

Ísland sendir til leiks landslið karla og kvenna í keppnina en þetta eru sautjándu leikar smáríkja Evrópu sem haldnir eru annað hvert ár. Síðustu leikar voru haldnir hér á landi fyrir tveimur árum þar sem bæði liðin okkar höfnuðu í 2. sæti.

Í báðum landsliðunum í þessu verkefni fá leikmenn sem leika í háskólum í Bandaríkjunum tækifæri til að taka þátt, sem er gleðiefni, en margir efnilegir leikmenn, sem hafa verið í yngri landsliðum og A-liðum undanfarin ár, iðka þar nám og leika körfuknattleik um þessar mundir.

Landslið kvenna er skipuð öllum þeim bestu leikmönnum sem leikfærir eru. Gunnhildur Gunnardóttir er barnshafandi og í fríi að þessu sinni. Ívar Ásgrímsson og aðstoðarþjálfarar hans Bjarni Magnússon og Hildur Sigurðardóttir, völdu 12 leikmenn í þetta verkefni, en fleiri leikmenn hafa verið við æfingar með þeim að undanförnu sem munu fá tækifæri í vináttulandsleikjum í Írlandi um miðjan júní í kjölfar Smáþjóðaleika.

Keflvíkingurinn Birna Valgerður Benónýsdóttir er eini nýliðinn í liðinu. Helena Sverrisdóttir er komin aftur inn í landsliðið eftir barnsburðarleyfi.

Ákvörðun var tekin af þjálfurum karlaliðsins að nýta þetta mót til að skoða yngri leikmenn og nota nokkra af þeim sem eru að fara á lokamót U20 landsliða í sumar spreyta sig í bland við aðra unga leikmenn.

Einungis þrír leikmenn karlaliðsins eiga A-leiki að baki sem eru í hóp að þessu sinni. Craig Pedersen, landsliðsþjálfari, valdi liðið með Finni Frey Stefánssyni og Arnari Guðjónsyni, aðstoðarþjálfurum sínum. Finnur Freyr mun stýra liðinu á leikunum en Finnur er einnig þjálfari U20 liðsins og Baldur Þór er hans aðstoðarþjálfari í báðum verkefnunum.

Kristófer Acox er reynslumesti leikmaður hópsins með 12 leiki en Ólafur Ólafsson hefur spilað 11 leiki og Tryggvi Snær Hlinason átta landsleiki.

Eftirtaldir leikmenn skipa landslið Íslands á Smáþjóðaleikunum í San Marino 2017:

Landslið kvenna

Berglind Gunnarsdóttir · Snæfell (8 landsleikir)

Birna Valgerður Benónýsdóttir · Keflavík

Emelía Ósk Gunnarsdóttir · Keflavík (2)

Hallveig Jónsdóttir · Valur (5)

Helena Sverrisdóttir · Haukar (61)

Hildur Björg Kjartansdóttir · UTPA, USA / Snæfell (12)

Ingunn Embla Kristínardóttir · Grindavík (9)

Ragna Margrét Brynjarsdóttir · Stjarnan (37)

Sandra Lind Þrastardóttir · Horsholms 79’ers, DK (11)

Sara Rún Hinriksdóttir · Canisius, USA / Keflavík (9)

Sigrún Sjöfn Ámundadóttir · Skallagrímur (44)

Thelma Dís Ágústsdóttir · Keflavík (2)

(Landsleikir innan sviga), Birna Valgerður er nýliði.

Þjálfarar verða Ívar Ásgrímsson og Bjarni Magnússon.

Landslið karla

Emil Karel Einarsson · Þór Þorlákshöfn

Gunnar Ólafsson · St. Francis, USA / Keflavík

Jón Axel Guðmundsson · Davidson, USA / Grindavík

Kári Jónsson · Drexler, USA / Haukar

Kristinn Pálsson · Marist, USA / Njarðvík

Kristófer Acox · KR (12 landsleikir)

Maciek Baginski · Þór Þorlákshöfn

Matthías Orri Sigurðarson · ÍR

Ólafur Ólafsson · Grindavík (11)

Pétur Rúnar Birgisson · Tindastóll

Tryggvi Snær Hlinason · Þór Akureyri (8)

Þórir Guðmundur Þorbjarnarson · KR



Þjálfarar verða Finnur Freyr Stefánsson og Baldur Þór Ragnarsson.

FIBA hefur útnefnt tvo dómara frá Íslandi til að dæma á Smáþjóðaleikunum en það eru okkar FIBA dómarar, þeir Leifur S. Garðarsson og Sigmundur Már Herbertsson, sem fara fyrir hönd Íslands og dæma á leikunum.

Að auki fer 5 manna fagteymi og fararstjórn frá KKÍ á mótið liðunum til halds og trausts.