Joshua sigraði Klitschko frammi fyrir 90.000 áhorfendum

Anthony Joshua sigraði Wladimir Klitschko í bardaga um heimsmeistaratitilinn í þungavigt frammi fyrir 90.000 áhorfendum á Wembley í gær.

Spennan var mikil fyrir bardagann sem stóð svo sannarlega undir væntingum.

Bardaginn fór nokkuð rólega af stað en í 5. lotu sló Joshua Klitschko niður. Úkraínumaðurinn svaraði með því að kýla Englendinginn niður í næstu lotu. Þetta var í fyrsta sinn á ferlinum sem Joshua er sleginn niður.

Næstu lotur voru afar spennandi en í þeirri elleftu kláraði Joshua dæmið og sigraði hinn 41 árs gamla Klitschko á tæknilegu rothöggi. Þetta er í fyrsta sinn í 13 ár sem hann tapar á rothöggi.

Joshua hefur unnið alla 19 bardaga sína á ferlinum, alla með rothöggi.