Sex ára samskiptavandi hamlar heilsugæslunni

 „Að sjálfsögðu tökum við þeim ábendingum alvarlega sem að okkur snúa,“ segir Svanhvít Jakobsdóttir, forstjóri Heilsugæslu Höfuðborgarsvæðisins um skýrslu Ríkisendurskoðunar. Skýrslan sýnir vanda Heilsugæslu höfuðborgarsvæðisins svart á hvítu en einnig um langvarandi samskiptavanda innandyra. Vissi velferðarráðuneytið vel af vandanum en hefur ekkert gert til að leysa hann.

Ráðuneytið hefur ítrekað verið upplýst um þessi vandamál frá árinu 2011 samkvæmt skýrslunni. Þann 14. apríl lýstu þáverandi yfirlæknar heilsugæslustöðva yfir vantrausti á Svanhvíti og komu sjónarmiðum sínum á framfæri bæði við starfsmenn ráðuneytisins og ráðherra. Í framhaldinu dró verulega úr samskiptum hennar og yfirlækna og hafa þau verið í lágmarki. Áður funduðu þessir aðilar reglulega.

Í svari ráðuneytisins til Ríkisendurskoðunar kemur fram að óháður aðili sé að gera úttekt á samskiptavandanum. Þar kemur einnig fram að verkefnið hafi tafist en viðtöl séu þó hafin. Er bent á að í desember 2016 hafi umboðsmaður Alþingis komist að þeirri niðurstöðu að áminning, sem Svanhvít veitti yfirlækni hjá stofnuninni í október 2015, hefði ekki verið í samræmi við lög. Í kjölfarið hafi 21 starfsmaður Heilsugæslunnar ritað henni bréf og lýst yfir fullum stuðningi við umræddan yfirlækni.

Samkvæmt ríkisendurskoðun þá hafa samstarfsörðugleikarnir haft langvarandi og hamlandi áhrif á starfsemi Heilsugæslunnar. Að mati stofnunarinnar hefði ráðuneytið þurft að grípa mun fyrr til aðgerða til að finna lausn og mikilvægt er að ráðuneytið læri af þessari reynslu.

Í svari velferðarráðuneytisins við spurningu Ríkisendurskoðunar um samskiptavandann segir að verið sé að vinna í málinu með þjónustu utanaðkomandi sérfræðinga. Er ráðuneytið hvatt til að leggja sitt af mörkum við að leysa samskiptavandann.

Er bent á að þegar bæta þurfi rekstur stofnunarinnar jafn mikið og raun ber vitni sé nauðsynlegt að framkvæmdastjórn hennar geti stutt og hvatt starfsfólk einstakra heilsugæslustöðva við að gera nauðsynlegar breytingar á starfseminni.

„Við fögnum skýrslunni sem að okkar mati staðfestir þann fjárskort sem Heilsugæslan glímir við og lýsir þeim skipulagsvanda sem er í heilbrigðiskerfinu,“ bætir Svanhvít við. Að öðru leyti vildi hún ekki tjá sig frekar um innihald skýrslunnar.

Fréttin birtist fyrst í Fréttablaðinu