Þrefaldur sigur Gerplu

Gerpla vann þrefaldan sigur á Íslandsmótinu í hópfimleikum sem fór fram í dag.

Fyrirfram var búist við að Stjarnan stæði uppi sem sigurvegari í kvennaflokki en Guðrún Georgsdóttir slasaðist í fyrstu umferð á dýnu.

Stjarnan varð fyrir vikið að bregðast fljótt við og endurskipuleggja sig en atvikið hafði greinilega mikil áhrif á liðið sem virtist alveg úr jafnvægi í seinni tveimur umferðunum.

Stjörnustúlkur vissu að það var á brattann að sækja og gerðu allt hvað þær gátu á trampólíni og gólfi.

Þrátt fyrir að hafa tryggt sér Íslandsmeistaratitilinn á þeim áhöldum dugði það ekki til. Gerpla varð Íslandsmeistari með 54.750 stig, 0.700 stigum á undan Stjörnunni og jafnframt Íslandsmeistari á dýnu.

Í flokki blandaðra liða var keppnin ekki síður hörð. Stjarnan hafði betur á gólfi og dýnu en frábær frammistaða Gerplu á trampólíni tryggði þeim Íslandsmeistaratitilinn.

Í karlaflokki vann Gerpla svo öruggan sigur á ungu liði Stjörnunnar.