Fjármálaeftirlitið mun meta hæfi nýrra eigenda í Arion

Fjármálaeftirlitið hefur hafið undirbúning að mati á hvort nýir eigendur í Arion banka séu hæfir. Fulltrúar eftirlitsins komu á fund efnahags- og viðskiptanefndar í morgun til þess að ræða söluna á hlut í Arion banka.

9,99 prósent engin tilviljun

Enginn kaupendanna á meira en 9,99 prósenta hlut í bankanum en það telst virk eign í fjármálastofnun ef eignarhaldið fer í 10 prósent eða meira. Það þýðir að þeir sem eru ekki virkir eigendur þurfa ekki að undirgangast hæfnismat.

Jón Þór Sturluson, aðstoðarforstjóri FME, sagði á fundinum að ekki sé ástæða til þess að ætla annað en að kaupendurnir ætli að gerast virkir eigendur – því sé þessi undirbúningur hafinn. Hins vegar sé þessi eignarhlutur, 9,99 prósent, engin tilviljun.

„Í þessum tilvikum höfum við ástæðu til þess að ætla að þeir hyggist gerast virkir eigendur. Þannig að í Fjármálaeftirlitinu er hafinn undirbúningur á könnun á hæfi þessara aðila sem virkra eigenda. Það er meðal annars þess vegna sem við höfum átt fundi með einhverjum þessara aðila og erum að bíða eftir frekari gögnum,“ sagði Jón Þór.

Vildu vita hvernig gjörningurinn yrði túlkaður

Aðspurður sagði hann fjárfestana hafa leitað álits FME um hvernig eftirlitið myndi „túlka þennan gjörning“. Því hafi eftirlitið verið í nokkrum samskiptum við bankann sjálfan og kaupendurna að undanförnu.

„Við höfum verið í ríkum samskiptum bæði við Arion banka sjálfan og Kaupþing félagið. Við höfum einnig verið í samskiptum við einstaka mögulega fjárfesta, bæði aðila sem eru ekki í þessum kaupendahópi og aðra sem eru í þessum kaupendahópi.“

Þá sagði Jón Þór að kaupendum hafi verið gert grein fyrir því að mat eftirlitsins velti meðal annars á hvernig menn hagi sér og hvernig málum vindi fram, auk þess sem eftirlitið geti ávallt skipt um skoðun. Nú þurfi að koma eignarhaldi í varanlegt horf.

Orðsporið til umræðu

Nefndarmönnum var nokkuð tíðrætt um hvort orðspor kaupenda skipti máli. Var í því samhengi meðal annars vísað til þess að einn kaupendanna, Och-Ziff, hafi verið sektað vegna brota á bandarískri spillingalöggjöf í september síðastliðnum.

Lilja Alfreðsdóttir, þingmaður Framsóknarflokks, spurði meðal annars hvort slæmt orðspor geti komið í veg fyrir kaup í fjármálafyrirtækjum hér á landi. „Einn sjóðurinn er uppvís af því að múta og fékk háar sektargreiðslur,“ spurði Lilja.

Jón Þór sagðist eiga erfitt með að svara spurningunni en að í grófum dráttum sé það þannig að ef aðili er ekki virkur aðili þá muni FME ekki aðhafast í málinu. Hins vegar eigi eftir að skoða málið til hlítar.