Unnu bæði Cleveland og San Antonio með leikstjórnanda á tíu daga samningi

Lið Dallas Mavericks hefur minnt aðeins á sig í NBA-deildinni í körfubolta með sigrum á tveimur af sterkustu liðum deildarinnar.

Dallas Mavericks vann 105-101 sigur á San Antonio Spurs á og fylgdi því síðan eftir með því að vinna 104–97 sigur á NBA-meisturum Cleveland Cavaliers.

Í þessum tveimur leikjum hefur liðið treyst á leikmann sem kom óvænt til liðsins í meiðslavandræðum leikstjórnenda liðsins.

Yogi Ferrell er 23 ára nýliði sem var ekki valinn í nýliðavalinu en gerði samning við Brooklyn Nets eftir að hafa spilað með liðinu í Sumardeildinni. Hann náði að spila tíu leiki áður en hann var látinn fara 8. desember síðastliðinn.

Árið 2016 endaði því ekki vel en árið 2017 gæti hinsvegar breytt miklu fyrir hann.

Yogi Ferrell skrifaði undir tíu daga samning við Dallas Mavericks 28. janúar og var ætlað að leysa af þá Deron Williams og J.J. Barea sem glíma báðir við meiðsli.

Dallas var búið að tapa 30 af 46 leikjum sínum þegar Yogi Ferrell skrifaði undir og ekki margir sem bjuggust við miklu af liðinu í leikjum á móti San Antonio Spurs (2. besta sigurhlutfallið í Vesturdeildinni) og Cleveland Cavaliers (Besta sigurhlutfallið í Austurdeildinni).

Yogi Ferrell kom inn í byrjunarliðið í leiknum á móti San Antonio Spurs þar sem hann var með 9 stig, 7 stoðsendingar og 2 stolna bolta í fjögurra stiga sigri.

Hann gerði síðan enn betur á móti Cleveland Cavaliers þar sem hann var með 19 stig, 5 fráköst, 4 stolna bolta og 3 stoðsendingar í sjö stiga sigri.

„Ég er að lifa drauminn minn,“ sagði Yogi Ferrell eftir leikinn en hann skilaði betri tölum en Stjörnuleikmaðurinn Kyrie Irving í þessum leik.

Yogi Ferrell hlýtur að fá nýjan samning þegar fyrrnefndur tíu daga samningur rennur út enda virðist hann falla mjög vel inn í leik liðsins og sóma sér vel við hlið yngri bróðir Stephen Curry, Seth Curry.

Seth Curry var með 40 stig samanlagt í þessum tveimur leikjum.  Saman voru byrjunarliðsbakverðir Dallas-liðsins, Seth Curry og Yogi Ferrell, því með 68 stig og 19 stoðsendingar í þessum tveimur flottu sigrum á tveimur af bestu liðum NBA-deildarinnar.