Slóvenskur blaðamaður: Á von á mikilli baráttu

Íslendingar hafa mætt Slóvenum 18 sinnum, unnið 9 leiki, gert 4 jafntefli en 5 sinnum hafa Slóvenar hrósað sigri. Síðast mættust liðin í Árósum í Danmörku fyrir tveimur árum og þá varð jafntefli, 32-32, niðurstaðan. Tomaz Kousca er sjónvarpsmaður RTV stöðvarinnar í Slóveníu.  Hverju má búast við af slóvenska liðinu á morgun?

„Ég held að þið getið átt von á mikilli baráttu vegna þess að Slóvenar vilja byrja mótið af krafti. Í gær unnu þeir Angola en sá leikur var bara upphitunarleikur fyrir leikinn gegn Íslendingum. Á morgun byrjar mótið þegar við mætum Íslandi,“ sagði Kousca.

Það eru 9 leikmenn í 15 manna hópnum núna sem voru með á Ólympíuleikunum í Rió í fyrra þar sem Slóvenum gékk mjög vel.

„Landar mínir voru mjög ánægðir með frammistöðuna á Ólympíuleikunum. Lið okkar er skipað ungum leikmönnum. Nokkrir reyndir leikmenn eru hættir eins og leikstjórnandinn Uroz Zorman og markvörðurinn Gorazd Skof. Sex leikmenn í hópnum eru að spila á sínu fyrsta stórmóti. Þetta er ungt lið sem við vonum að standi sig vel hér í Frakklandi.“

Hverjir eru lykilmennirnir í liðinu?

„Við erum með blöndu af reyndum og óreyndum leikmönnum. Vid Kavticnik hjá Montpellier var með Slóvenum fyrir 13 árum þegar  töpuðu fyrir Þjóðverjum í úrslitum Evrópumótsins í Slóveníu. Af ungu mönnunum má nefna leikstjórnandann Mia Zarabech hjá Celje. Hann meiddist í vináttuleikjum gegn Frökkum fyrir mót og var ekki með gegn Angóla í fyrsta leik. Hann spilar gegn Íslendingum og er mjög góður leikstjórnandi.“

Hvað segja fjölmiðlar í Slóveníu um að Aron Pálmarsson spili ekki með Íslendingum á HM?

„Við vonum að það séu góðar fréttir fyrir okkur og að það verði auðveldara að eiga við Íslendinga án hans.“

Hvernig heldurðu að leikurinn verði?

„Nú byrjar mótið fyrir alvöru hjá okkur. Ég reikna með spennandi leik. Bæði lið spila hraðan leik. Það hafa alltaf verið spennandi leikir milli þessara liða og ég held að engin breyting verði á því núna.

Uroz Zorman ákvað að leggja landsliðskóna á hilluna eftir Ólympíuleikana í Ríó, kemur hann til með að skipta um skoðun?

„Hann er í góðu sambandi við landsliðsþjálfarann Veselin Vujovic sem bað hann um að halda áfram, ekki á stórmótum heldur að hjálpa liðinu í nokkrum leikjum í forkeppni. Hann er mjög reyndur og við þurfum á honum að halda. Hann lék í forkeppni þessa móts en Zorman veit að hann spilar ekki hér. Í forkeppni EM kemur hann okkur til hjálpar í einhverjum leikjum.“

Þú heldur að Slóvenar komi ekki til með að sakna Uros Zorman gegn Íslendingum?

„Nei það held ég ekki. Við erum núna með tvo góða leikstjórnendur og ég held að við eigum ekki eftir að sakna hans í þessum leik.“

Ekki missa af neinu sem gerist á HM í Frakklandi. Vísir er með öflugt fréttateymi á mótinu sem færir ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).