Töfrar frá Tony Parker í sterkum sigri Spurs | Myndbönd

San Antonio Spurs vann gríðarlega sannfærandi heimasigur á einu allra besta liði austurdeildarinnar, Toronto Raptors, 110-82, þegar liðin mættust í NBA-deildinni í körfubolta í nótt.

Spurs-liðið varðist mjög vel í leiknum en aldrei áður á leiktíðinni hefur Toronto skorað svona lítið í einum leik. Kyle Lowry, leikstjórnandi Raptors, sem hefur verið sjóðheitur undanfarið skoraði aðeins sex stig og brenndi af öllum sjö þriggja stiga skotum sínum.

Kawhi Leonard var stigahæstur Spurs með 25 stig auk þess sem hann tók fjögur fráköst en kraftframherjinn LaMarcus Aldridge spilaði frábærlega og skoraði 23 stig auk þess sem hann tók átta fráköst og gaf sex stoðsendingar.

Tony Parker, leikstjórnandi San Antonio, minnti heldur betur á gamla tíma þegar hann gaf geggjaða stoðsendingu á Leonard í öðrum leikhluta án þess að horfa en þessi tilþrif má sjá í spilaranum hér að ofan.

Boston Celtic er búið að vinna tvo leiki í röð og er áfram í þriðja sæti austurdeildarinnar en það lagði Utah Jazz, 115-104, á heimavelli sínum í nótt. Isaiah Thomas átti stjörnuleik fyrir heimamenn en hann skoraði 29 stig og gaf fimmtán stoðsendingar sem er persónulegt met hjá honum.

Úrslit næturinnar:

Philadelphia 76ers - Minnesota Timberwolves 93-91

Boston Celtics - Utah Jazz 115-104

Detroit Pistons - Indiana Pacers 116-121

Dallas Mavericks - Washington Wizards 113-105

San Antonio Spurs - Toronto Raptors 110-82

Denver Nuggets - Sacramento Kings 113-120

Phoenix Suns - Miami Heat 99-90

LA Lakers - Memphis Grizzlies 116-102