Breytingar á aðstæðum Breivik í fangelsinu

Norsk fangelsismálayfirvöld hafa gert breytingar sem snúa að aðstæðum Anders Behring Breivik í fangelsi þar sem hann afplánar dóm fyrir hryðjuverkaárásina í Ósló og Útey árið 2011 þar sem hann drap 77 manns.

NRK segir frá þessu. Breivik hefur búið við mikla einangrun og komst norskur dómstóll að þeirri niðurstöðu í vor að yfirvöld brytu að hluta á mannréttindum fangans.

Bæði norska ríkið og Breivik hafa áfrýjað dómnum.

Þær breytingar verða nú gerðar að rimlar verði milli Breivik og lögfræðings hans þegar þeir ræða saman, í stað glerveggjar. Þetta kemur fram í gögnum sem voru gerð opinber í dag.

Breivik mun jafnframt fá aukna möguleika á að hreyfa sig og dvelja undir berum himni á fangelsislóðinni.